Sverrir Vilhelmsson

Hæstiréttur hefur dæmt karlmann í fjögurra og hálfs árs fangelsi fyrir nauðgun gegn barnsmóður sinni. Staðfesti Hæstiréttur dóm Héraðsdóms Suðurlands yfir manninum, sem einnig var dæmdur til að greiða konunni 1,2 milljónir króna í bætur.

Fram kemur í Hæstarétti, að maðurinn var ákærður fyrir að hafa ráðist að konunni nótt eina í mars á síðasta ári, hrint henni í stofugólfið þar sem hann sparkaði í hana, veitti henni fjölda hnefahögga í höfuð og líkama, reif í hár hennar, sló höfði ítrekað í gólfið. Þá þvingaði hann hana til  samræðis með ofbeldi.

Þá var maðurinn ákærður fyrir líkamsárás að morgni sama dags þegar hann veittist að konunni á ný í eldhúsi og sló hana mörgum hnefahöggum, einkum í kvið, bak og höfuð, auk þess að trampa á henni þar sem hún var í hnipri á eldhúsgólfi. Við þetta hlaut hún fjölda áverka.

Hæstiréttur taldi, að frásögn konunnar fyrir dómi hefði verið í öllum atriðum á sama veg og hjá lögreglu, neyðarmóttöku og þeim lækni, sem skoðaði hana strax næsta dag eftir að atvik málsins urðu. Var framburður hennar metinn trúverðugur en framburður mannsins, sem neitaði sök, ótrúverðugur. Taldi dómurinn að lögfull sönnun hefði verið færð fram um að maðurinn hefði gerst brotlegur eins og ákæra sagði til um.

Við ákvörðun refsingar var litið til þess að maðurinn braut gegn konunni á heimili hennar og árásin stóð yfir í langan tíma. Miklir áverkar voru á konunni eftir árásina, árásin var hrottaleg og unnin á heimili hennar að nóttu til og henni haldið þar nánast í gíslingu með rétt ársgamalt barn sitt.