Jóhanna Sigurðardóttir og Kaj Leo Johannesen á Þingvöllum í dag.

Kaj Leo Johannesen, lögmaður Færeyja, sagði á fundi með Jóhönnu Sigurðardóttur, forsætisráðherra, á Þingvöllum í dag, að í Færeyjum væri fylgst grannt með framgangi mála á Íslandi, sérstaklega nú þegar Ísland hafi sótt um aðild að Evrópusambandinu. Úrslit mála í aðildarferlinu gætu haft veruleg áhrif á evrópupólitíska umræðu í Færeyjum.

Jóhanna sagði að samstarfsmöguleikar milli Íslands og Færeyja hefðu ekki verið nýttir til fullnustu. Í viðræðum við Evrópusambandið gætu einnig falist nýjir möguleikar á þessu sviði og haft yrði náið samráð við Færeyinga um Evrópumálin á næstu misserum.

Í tilkynningu frá forsætisráðuneytinu segir, að að viðræðufundi þeirra Jóhönnu og Kaj Leo hafi verið fjallað um ýmis sameiginleg mál Færeyinga og Íslendinga á sviði heilbrigðismála, mennta- og háskólasamvinnu og ekki síst samskipta í sjávarútvegsmálum. Lögð var áhersla á að gerður yrði tvíhliða samningur milli þjóðanna um heilbrigðismál á grundvelli gildandi viljayfirlýsingar, en samstarf er þegar hafið milli Landspítala og Landssjúkrahúss Færeyja. Þá var skipst á skoðunum um reynslu þjóðanna af því að ganga í gegnum kreppu og glíma við fólksflótta. Einnig var sérstaklega rætt um framkvæmd Hoyvíkursáttmálans milli Færeyja og Ísland.

Jóhanna ítrekaði þakkir Íslendinga til Færeyinga vegna lánveitingar þeirra til Íslands og sagði m.a. að þverpólitísk samstaða Færeyinga um þetta lán, sem veitt var skilyrðislaust þegar allir aðrir snéru við Íslendingum baki í fyrra, sýni hug þeirra betur en nokkur orð. „Þessi ákvörðun Færeyinga sýndi að þeir eru vinir í raun. Það kom ekki á óvart og því gleymum við ekki," sagði hún

Haft er eftir Kaj Leo Johannesen  að tilgangurinn með heimsókn hans hingað væri að bera saman bækur um ástandið í stjórnmálum og efnahagsmálum og ræða framtíðarmálefni þjóðanna. Með samstarfi stæðu vinir sterkari en ella í heiminum.