Fjöld þjófnaðarmála kom upp um helgina, þar á meðal var þvotti stolið úr þvottahúsi. Brynjar Gauti

Allmörg þjófnaðarmál komu á borð lögreglunnar um liðna helgi og ásældust þjófarnir muni af ýmsu tagi þótt þeir hafi einkum verið á ferð í verslunarmiðstöðvum í Reykjavík og Kópavogi. Hinir óprúttnu aðilar eru á öllum aldri að sögn lögreglunnar, jafnt karlar sem konur. Yngsti þjófurinn sem var gripinn um helgina er 12 ára strákur en sá elsti kona um sextugt.

Þjófarnir sækja mikið í snyrtivörur en líka matvöru, ekki síst sælgæti en þá eiga gjarnan í hlut fingralangir unglingar að sögn lögreglu.

Óvenjulegasta þjófnaðarmál helgarinnar var þó sennilega þegar þvotti var stolið úr þvottahúsi fjölbýlishúss í borginni. Grunur beindist fljótt að ákveðnum aðila og viðurkenndi sá verknaðinn. Kom einnig á daginn að viðkomandi hafði áður stolið úr sama þvottahúsi.

Þá voru þrír dekkjaþjófar gripnir í Reykjavík eldsnemma morguns en þeir voru sakleysið uppmálið þegar lögreglan kom á vettvang. Í bíl þeirra fannst hinsvegar sitthvað athugunarvert, þ.e. fíkniefni og þýfi. Í framhaldinu var farið í húsleit á heimili eins þeirra og þar fundust fleiri munir sem þremenningarnir áttu fremur erfitt með að gera grein fyrir.

Um helgina bárust lögreglunni sex tilkynningar um innbrot í bíla. Um var að ræða innbrot í bíla í Reykjavík, Kópavogi og Hafnarfirði en úr þeim öllum var stolið ýmsum verðmætum.