Stefán Skjaldarson afhenti í dag forseta Austurríkis, Heinz Fischer, trúnaðarbréf sitt sem sendiherra Íslands í landinu. Athöfnin fór fram í Hofburg sem var áður keisarahöllin í Vín.

Umræðuefni á fundinum voru m.a. tvíhliða samskipti Íslands og Austurríkis, aðildarumsókn Íslands að Evrópusambandinu og alþjóðamál. 

Fram kemur í tilkynningu frá utanríkisráðuneytinu að tvíhliða samskipti Íslands og Austurríkis séu vinsamleg og í góðum farvegi og það hafi verið staðfest í samtölum við forsetann.

Fremur lítil skráð vöruviðskipti eru milli Íslands og Austurríkis en margir austurrískir ferðamenn leggja leið sína til Íslands, sem og íslenskir ferðamenn til Austurríkis.  Þá eru samskiptin á menningarsviðinu blómleg og hafa margir íslenskir listamenn hlotið menntun sína í Austurríki.

 Á vettvangi alþjóðamála á samstarf sér einkum stað á vettvangi Evrópska efnahagssvæðisins, sem og í alþjóðastofnunum á borð Öryggis- og samvinnustofnun Evrópu, ÖSE, og Sameinuðu þjóðunum. 

 Austurríki gegnir afar mikilvægu hlutverki á alþjóðavettvangi og eru höfuðstöðvar margra alþjóðastofnana staðsettar í Vín, s.s. ÖSE, Sameinuðu þjóðirnar, Alþjóðakjarnorkumálastofnunin, undirbúningsnefnd allsherjar-samningsins um bann við tilraunum með kjarnavopn (CTBTO), o.fl.

Sendiráð Íslands í Vín fer einnig með fyrirsvar gagnvart mörgum nágrannaríkjum í Mið-Evrópu og á Balkanskaga, en Austurríki á langa samskiptasögu við þessi ríki og er einnig viðskipta- og samskiptamiðstöð við þau.