Lögreglan fékk ábendingu um hvar litháínsku konuna, sem lögreglan á Suðurnesjum lýsti eftir í gær, væri að finna í gærkvöldi og handtók lögreglan á höfuðborgarsvæðinu hana í Reykjavík laust fyrir miðnætti í gærkvöldi. Mál konunnar sætir áframhaldandi rannsókn lögreglunnar á Suðurnesjum og beinist m.a. að því að upplýsa hver konan er auk mansalsþáttarins, að því er segir í tilkynningu frá lögreglunni.

Gæsluvarðhald yfir mönnunum þremur sem taldir eru tengjast máli konunnar rennur út síðar í dag en lögreglustjórinn á Suðurnesjum mun krefjast framhalds á gæsluvarðhaldi þeirra vegna rannsóknarhagsmuna.

Talið er víst að fjórði maðurinn, Vitalius Gejer, sem lýst var eftir vegna málsins í gær, hafi farið af landi brott í síðust viku. Ekki er vitað hvenær eða hvort hann muni snúa aftur til landsins.

Lögreglan á Suðurnesjum vill þakka almenningi og fjölmiðlum fyrir frábæra aðstoð við rannsókn málsins en fjölmargar ábendingar bárust lögreglu frá almenningi og mikil umfjöllun fjölmiðla átti sinn þátt í að konan fannst eins fljótt og raun varð á, að því er fram kemur í tilkynningu.

Lögreglan telur að konan hafi verið flutt til landsins sem fórnarlamb mansals og hafi komið hingað til lands á stolnum ferðaskilríkjum. Hún kom hingað undir nafninu Ieva Grisiúte.

Konan kom hingað til lands með flugi síðastliðið föstudagskvöld og var flutt rænulítil á sjúkrahús eftir að hafa látið ófriðlega í flugvélinni síðasta hluta leiðarinnar. Hún dvaldi á sjúkrahúsi aðfararnótt laugardagsins en síðan hjá lögreglunni á Suðurnesjum að eigin ósk. Hún sagðist ekki eiga í nein hús að venda og engan þekkja hér á landi og gat litlar skýringar gefið á ferð sinni hingað til lands.