Talið er að konan hafi verið flutt hingað til landsins til að stunda vændi. Reuters

Lögreglustjórinn á Suðurnesjum hefur farið fram á gæsluvarðhald yfir tveimur litháískum karlmönnum sem gáfu sig fram við lögreglu eftir eftirlýsingu í gær. Mennirnir eru grunaðir um aðild að mannsalsmáli sem nýverið kom upp. Þá hefur lögregla komist að því hver konan er sem flutt var hingað til lands, en hún framvísaði fölsuðum skilríkjum.

Konan kom hingað til lands með flugi föstudaginn 9. október og var flutt rænulítil á sjúkrahús eftir að hafa látið ófriðlega í flugvélinni síðasta hluta leiðarinnar. Hún sagðist ekki eiga í nein hús að venda og engan þekkja hér á landi og gat litlar skýringar gefið á ferð sinni hingað til lands.

Þrír menn voru handteknir þann 13. október sl. vegna þessa máls og sitja
þeir í gæsluvarðhaldi til 21. október nk. Í kjölfarið var lýst eftir þremur mönnum til viðbótar og gáfu þeir sig allir fram við lögreglu í gær og voru handteknir í kjölfarið. Einum mannanna var sleppt fljótlega eftir viðtal en farið hefur verið fram á gæsluvarðhald yfir tveimur.

Að öðru leyti eru litlar upplýsingar um rannsóknina að fá og vísað til rannsóknarhagsmuna.