Fangaklefi á Litla Hrauni. mbl.is/Brynjar Gauti

Ekki verður krafist gæsluvarðhalds yfir manni sem handtekinn var í gær vegna rannsóknar á meintu mansalsmáli. Maðurinn var yfirheyrður í dag og látinn laus í kjölfarið, samkvæmt upplýsingum frá lögreglunni á Suðurnesjum. Fimm karlmenn frá Litháen sitja í gæsluvarðhaldi vegna málsins. 

Yfirheyrslur hafa staðið yfir í málinu í dag og ýmis gagnaöflun. Áfram er unnið að rannsókninnni af fullum þunga en hún er á viðkvæmu stigi og ekki unnt að tjá sig frekar um hana að sinni, samkvæmt tilkynningu frá lögreglu.

Tveir voru í Héraðsdómi Reykjaness í gær úrskurðaðir í gæsluvarðhald til 21. október. Mennirnir gáfu sig fram við lögreglu Suðurnesja á laugardagskvöld en áður hafði verið lýst eftir þeim.

Kona sem einnig er frá Litháen kom hingað til lands með flugi frá Varsjá í Póllandi föstudaginn 9. október. Við komuna var hún flutt rænulítil á sjúkrahús. Hún dvaldi þar yfir nótt en síðan í umsjá lögreglu – fyrir utan stuttan tíma sem hún hvarf. Hún gat litlar skýringar gefið á ferð sinni hingað til lands og hafði ekki í nein hús að venda. Vaknaði þá þegar grunur að um mansal væri að ræða.