Seltjarnarnesbær ætlar að bjóða bæjarbúum upp á fyrirlestur um Íslendingasöguna Gunnlaugssögu Ormstungu á vef bæjarins. Ásgerður Halldórsdóttir bæjarstjóri Seltjarnarness og Sólveig Pálsdóttir formaður menningarnefndar kynntu vefverkefnið í dag og var fyrsti hluti fyrirlestrarins opnaður við góðar undirtektir hjá félagsstarfi aldraðra á Skólabraut. Þetta kemur fram í fréttatilkynningu frá bænum.

Þar kemur einnig fram að Seltjarnarnesbær hafi verið í fararbroddi sveitarfélaga hvað rafræna stjórnsýslu varðar með vefsvæðinu Rafrænt Seltjarnarnes. Með þessu verkefni sé rafræna þjónustan víkkuð út yfir í menningarmál og afþreyingu. Seltirningar geti nú notið Gunnlaugssögu Ormstungu í fylgd Magnúsar Jónssonar.

Hugmyndin að baki verkefninu sé að færa menningartengdan fróðleik og afþreyingu heim til fólks um vefinn.

Fyrirlesturinn er í þremur hlutum og var fyrsti hlutinn opnaður í dag, viku síðar verður annar hlutinn opnaður og lokahlutinn verður aðgengilegur miðvikudaginn 4. nóvember.

Að verkefninu standa auk Seltjarnarnesbæjar félagið Söguvefur og Lífsmynd kvikmyndagerð en Valdimar Leifsson annaðist kvikmyndagerð og frágang myndefnis. Fyrirlesturinn var tekinn upp á Bókasafni Seltjarnarness og myndefni var einnig tekið á söguslóðum í Borgarfirði og á Þingvöllum.

Félagið Söguvefur er með vefsvæði í smíðum þar sem ætlunin er að bjóða öllum aðgang að sögutengdum fróðleik. Sagan um Gunnlaug Ormstungu er fyrsta verkefnið og fyrirhugað er að kvikmynda fleiri á komandi misserum. Einnig má nefna að Söguvefur hefur í hyggju að kvikmynda leiðsögn um áhugaverðar gönguleiðir á söguslóðum.