„Landið fer að rísa en kannski ekkert rosalega hratt,“ sagði Ólafur Darri Andrason, hagfræðingur ASÍ, er hann kynnti nýja hagspá á ársfundi ASÍ. Hann benti á að heimilin væru að draga útgjöld sín mjög mikið saman á þessu ári eða um eina krónu af hverjum fimm, sem þau hafa til ráðstöfunar.

„Atvinnuleysið er algerlega skelfilegt,“ sagði hann. Í ár er meðalatvinnuleysið um 8%. Útlit er fyrir að atvinnuástandið fari versnandi þegar líður á veturinn og að það nái hámarki á næsta ári, verði 10%. Ólafur Darri benti á að það væri ekkert sjálfgefið að atvinnuleysið næðist niður í venjulegt horf á næstu árum. Hættan væri fyrir hendi á að langtímaatvinnuleysi festist í sessi yrði ekkert að gert. „Við verðum að vera á tánum og verkalýðshreyfingin verður að tryggja að þetta ástand verði ekki til langframa,“ sagði hann.

Ársfundur ASÍ stendur yfir í tvo daga. Eftir hádegi fara fram umræður á fundinum um atvinnumál, efnahags- og kjaramál og hagsmuni heimilanna. Þeirri umræðu verður svo haldið áfram á morgun en þá verður einnig fjallað um tillögur að lagabreytingum Alþýðusambandsins og fram fer kosning varaforseta ASÍ og kosið verður í hluta miðstjórnar.

Ný hagspá ASÍ