mbl.is/Ómar

Sjö liggja á gjörgæslu vegna H1N1 inflúensunnar, svínaflensu, en auk þess er ein manneskja til viðbótar á gjörgæslu með svínaflensu en er á gjörgæslu vegna annars sjúkdóms. Átta voru lagðir inn á Landspítalann með flensuna í gærkvöldi og nótt, þar af tveir á gjörgæslu, að sögn Haraldar Briem sóttvarnarlæknis.

Einn á gjörgæsludeild á Akureyri

Af þessum sjö sem eru á gjörgæslu vegna svínaflensunnar eru sex á gjörgæsludeild Landspítalans en einn á gjörgæsludeild Sjúkrahússins á Akureyri.

Átta voru lagðir inn á Landspítalann með svínaflensu í gærkvöldi og í nótt og eru á milli þrjátíu og fjörtíu sjúklingar á spítalanum vegna flensunnar.

Á Sjúkrahúsinu á Akureyri eru fjórir sjúklingar með svínaflensu, þar af einn á gjörgæslu. Á Suðurnesjum eru þrír sjúklingar á Heilbrigðisstofnun Suðurnesja með svínaflensu og einn á Blönduósi. 

Ákveðið hefur verið að kaupa tvær lungnavélar fyrir Landspítalann, að verðmæti 22 milljónir króna, en talið er að fleiri slíkra véla sé þörf vegna svínaflensufaraldursins.