Rjúpnaveiðitímabilið hefst næstkomandi föstudag og stendur til 6. desember. Nú er heimilt að veiða 18 daga ár hvert, á föstudögum, laugardögum og sunnudögum. Talið er að um fimm þúsund manns stundi reglulega rjúpnaveiði. Nýtt myndband um rjúpnaveiði má nú finna á heimasíðu Skotvís, landssambands um skynsamlega skotveiði.

Eins og kunnugt er ákvað umhverfisráðherra að fyrirkomulag rjúpnaveiða í haust verði frábrugðið því sem var í fyrra. Hefur tveimur helgum verið bætt við tímabilið en til mótvægis hafa veiðihelgarnar verið styttar úr fjórum dögum í þrjá og nú má veiða föstudaga, laugardaga og sunnudaga. Hefst veiðitímabilið næstkomandi föstudag, 30. október, og lýkur á sunnudeginum 6. desember. Er veiðiáætlunin byggð á mati Náttúrufræðistofnunar á veiðiþoli rjúpnastofnsins og mati Umhverfisstofnunar á heildarveiði árið 2008.

Náttúrustofnun metur það nú sem svo að fækkun rjúpna árið 2005 og 2006 sé nú að baki og að stofninn sé nú í vexti um land allt. Árið 2003 og 2004 var rjúpan alfriðuð og voru eflaust margir Íslendingar skúffaðir þau jólin því samkvæmt könnun sem gerð var árið 2000 borðar um fjórðungur landsmanna rjúpur á jólum. Þá var sóknarskerðing 2007 og 2008, en þá var ákveðið að fækka dögum í átján.

Talið er að um fimm þúsund manns gangi til rjúpnaveiði ár hvert og samkvæmt könnun stunda rúmlega fimmtán prósent veiðikorthafa aðeins rjúpnaveiðar.

Á vef Skotvíss, landssamtaka um skynsamlega skotveiði, má nú sjá nýtt myndband þar sem farið er yfir sögu skotveiða, farið yfir öryggisatriði um meðferð skotvopna og fleira.

Hér má sjá myndbandið.