Hlutur sem kom á línuna hjá Gulltoppi GK 24 á föstudaginn var er líklega úr þýskri flugvél sem skotin var niður við Grímsey árið 1943. Þeir sjö sem voru um borð björguðust allir mynduðu ævilöng tengsl við menn í herskipinu sem tók þá til fanga.

Siglo.is skýrir frá því að síðastliðinn föstudag hafi báturinn Gulltoppur GK 24 komið að landi á Siglufirði með dularfullan hlut úr álsteypu sem þeir höfðu fengið á línuna. Var hluturinn nokkuð illa farinn en þó mátti sjá nokkur orð úr þýsku sem greiftruð höfðu verið á málmspjöld.

Eftir nokkra eftirgrennslan var komist að þeirri ályktun að sennilega þetta tæki tengs hliðarstýriblöku og hjálparstýri.

Á vefnum segir að Skúli Jón Sigurðarson, sem starfaði hjá Flugmálastjórn í marga áratugi, meðal annars við rannsókn á flugslysum, hafi haft samband við umsjónarmenn síðunnar. Segir hann að hluturinn sem Gulltoppur kom með að landi ,,sé örugglega hluti úr þýskri flugvél, ekki ólíklega úr Focke Wulf FW 200 Condor F8+FL, frá III/KG-40 flugsveitinni, en vélin varð að nauðlenda brennandi skammt austan Grímseyjar 5. ágúst 1943, eftir að tvær P-38 Lightning orrustuflugvélar (Dick Holly og William Bethea) sem voru í eftirlitsflugi frá Kassos flugvelli (Melgerðismelum) réðust á hana. Áhöfnin öll, sjö manns, komst í björgunarbát og var bjargað.”
 
Að sögn Skúla var það bandaríska ratsjárstöðin á Siglunesi sem sá flugvélina og staðsetti hana. Þaðan fór síðan bátur að staðnum og skipbrotsmennirnir handteknir. Var þeim að því loknu komið í bandarískt herskip.

Þjóðverjarnir voru sagðir hafa orðið undrandi á ,,góðum" móttökum Ameríkananna og milli þeirra urðu síðan ævilöng vináttubönd. Flugstjórinn var Karl Holtrup yfirliðþjálfi (Oberfeldwebel) frá Dusseldorf. Hinir voru: Ofw. Karl Holtrup, Uffz. Günter Karte, Fw. Josef Teufel, Uffz. Herbert Richter, Ofw. Emil Brandt, Gfr. Wilhelm Lehn og Obgfr. Siegfried Klinkmann.
 
Sjá nánar á heimasíðu siglo.is