„Stjórnvöld hafa kúvent í atvinnustefnu sinni og forsendur stöðugleikasáttmálans um uppbyggingu stóriðju eru brostnar,“ segir Tómas Már Sigurðsson, forstjóri Alcoa á Íslandi. Hann vísar þar til ræðu Árna Páls Árnasonar félagsmálaráðherra á ársfundi ASÍ í sl. viku.

Í ræðunni sagði Árni Páll nauðsynlegt að fara nýjar leiðir í atvinnumálum með því að skattleggja orku- og auðlindanýtingu. Ráðherra sagði að grátkór og kveinstafir útgerðar- og álfyrirtækja yrði sífellt háværari og ágengari.

„Ef sjávarútvegur og stóriðja geta ekki þolað hóflega innköllun veiðiheimilda og hóflega auðlindaskatta er spurning hvort við séum yfir höfuð að veðja á réttan hest. Verðum við þá ekki að leita annarra kosta um framtíðaratvinnuuppbyggingu?“ sagði ráðherra.

„Ég veit ekki um hvað maðurinn er að tala,“ segir Tómas Már Sigurðsson. „Við hjá Alcoa leggjum mikið til samfélagsins. Við keyptum þjónustu á síðasta ári fyrir tæpa tíu milljarða króna og greiddum laun fyrir hálfan fimmta milljarð. Beinar skattgreiðslur okkar í fyrra voru um fjórir milljarðar króna að ónefndum hafnargjöldum og raforkureikningum,“ segir forstjóri Alcoa sem finnst ræða ráðherrans einkennast af sleggjudómum.

„Þegar ég hlustaði á þessa ræðu félagsmálaráðherra fór um mig kaldur hrollur,“ segir Vilhjálmur Birgisson formaður Verkalýðsfélags Akraness.

Nánar er fjallað um þetta málí Morgunblaðinu í dag.