Frá smölun útigangskinda í Mýrdal. Mbl.is/Jónas Erlendsson

Vesturbyggð og Tálknafjarðarhreppur standa fyrir smölun á útigangsfé á Tálkna í fyrramálið en talið er að milli fimmtán og tuttugu kindur séu á svæðinu. Síðasta stóra smölun af þessu tagi fór fram fyrir nokkrum árum en alltaf eru einhverjar kindur á svæðinu. Farið verður með þær kindur sem reynast vera eigendalausar í sláturhús.

„Samkvæmt lögum ber hverju sveitarfélagi að standa fjallskil, þ.e að ölllum kindum á svæðinu sé smalað og þær ekki skildar eftir á vergangi,“ segir Ragnar Jörundsson, bæjarstjóri Vesturbyggðar. „Við vilja framfylgja reglum um að lönd séu smöluð og eins verður þetta gert út frá dýraverndunarsjónamiðum, við viljum ekki að kindurnar séu þarna á hryggnum í alls kyns veðrum, að drepast úr hor eða hrynja fram af klettum.“

Segir Ragnar að síðasta smölun af þessu tagi hafi farið fram fyrir nokkrum árum en þá varð að skjóta einhverjar kindur sem höfðu komið sér í sjálfheldu og ekki hægt að nálgast þær. Ávallt sé eitthvað um útigangsfé á svæðinu, við Siglunes og víðar.

Nú hefur sést til sautján kinda á svæðinu en þyrla Landhelgisgæslunnar sem var þarna í gær vegna björgunaræfinga taldi sjö kindur.

Ragnar segir smölunina kosta heilmikið fé og fyrirhöfn því landið sé erfitt yfirferðar en Tálkni er fjallshryggurinn á milli Tálknafjarðar og Patreksfjarðar. Vesturbyggð leggur til fjóra smalamenn sem séu bændur sem þekki svæðið og svipaður fjöldi komi frá Tálknafjarðarhreppi. Þá sé búið að fá björgunarsveitina til þess að aðstoða á báti því féð leiti oft niður í fjöru.

„Við munum smala saman öllu þeim kindum sem á svæðinu eru og reyna svo að finna eigendurnar samkvæmt búmarki. Samkvæmt lögum á sveitarfélagið þær kindur sem eru ómerktar og ef einhverjar slíkar eru þarna verða þær fluttar í sláturhús.“