Samkvæmt tekjubókhaldi ríkisins voru rúmlega 10 þúsund einkahlutafélög með gjaldfallnar skuldir við innheimtumenn í árslok 2008. Eftirstöðvarnar námu 49,5 milljörðum króna, þar af námu dráttarvextir 16 milljörðum.

Fjallað er um þetta í nýrri skýrslu Ríkisendurskoðun um framkvæmd fjárlaga fyrir yfirstandandi ár. Þar kemur fram, að skili skattskyldir aðilar ekki framtölum beri skattyfirvöldum að leggja á þá skatta út frá áætluðum tekjum. Á undanförnum árum hafi Ríkisendurskoðun vakið athygli á miklu umfangi áætlana í virðisaukaskatti og opinberum  gjöldum og þeim vandræðum sem þessar áætlanir hafi skapað í uppgjöri og innheimtu ríkissjóðstekna. Að mati stofnunarinnar megi rekja stóran hluta þessa vandamáls til fjölgunar einkahlutafélaga, en samkvæmt upplýsingum frá ríkisskattstjóra voru einkahlutafélög 89% lögaðila við álagningu 2008.

Í Tíund, fréttablaði Ríkisskattstjóra, sem út kom í desember 2008, sagði að uppgangur í þjóðfélaginu á síðustu árum hafi leitt til mikillar fjölgunar einkahlutafélaga um ýmiss konar rekstur. Þá hafi eignarhaldsfélögum, sem stofnuð eru um rekstur annars félags eða félaga, fjölgað mikið. Þriðja hvert einkahlutafélag skili ekki framtali innan tilskilins frests og sæti því áætlun.

Ríkisendurskoðun segist ítrekað hafa lagt til að nýtt séu ákvæði laga um einkahlutafélög til að fækka þessum félögum. Samkvæmt lögunum geti ráðherra krafist þess að einkahlutafélag sé tekið til skipta og  hlutafélagaskrá getur afskráð slíkt félag, hvor tveggja að uppfylltum ákveðnum skilyrðum.