Uppsafnaður halli af rekstri Landspítala eykst stöðugt. Ómar Óskarsson

Ríkisendurskoðun segir að of margar af þeim stofnunum sem bent var á um mitt ár að ættu í verulegum rekstrarvanda séu enn í vandræðum. Þá hafi raunar hefur bæst í hóp þeirra stofnana sem glíma við rekstrarvanda og það sé ólíðandi.

Ein þeirra stofnana, sem Ríkisendurskoðun benti á um mitt árið að ætti við mikinn rekstarvanda að etja er Landspítalinn. Í upphafi ársins nam uppsafnaður halli spítalans um 1,6 milljörðum króna og samkvæmt
rekstraráætlun var gert ráð fyrir að hann myndi ekki aukast á árinu. Nú sé hins vegar útlit fyrir 1,2 milljarða hallarekstur á árinu og að uppsafnaður halli verði því 2,8 milljarðar í árslok.

Ríkisendurskoðun segir í nýrri skýrslu um framkvæmd fjárlaga, að af hallarekstri ársins hjá Landspítala sé tæplega helmingur vegna hærri  launakostnaðar en gert var ráð fyrir í áætlun. Í frumvarpi til fjárlaga 2010 birtist skýr krafa um niðurskurð hjá spítalanum.

„Það er mat Ríkisendurskoðunar að aðhald og eftirlit heilbrigðisráðuneytisins með rekstri spítalans sé veikt, ólíkt því sem á við um langflestar aðrar heilbrigðisstofnanir. Þetta birtist m.a. í því að aðeins hluti þeirra hagræðingaraðgerða sem gripið hefur verið til hefur borið árangur og spítalinn því enn rekinn með verulegum halla. Þrátt fyrir þetta hefur ráðuneytið hvorki gefið skýr fyrirmæli um hvernig á að skerða þjónustu né tryggt spítalanum auknar fjárveitingar. Verði ekki tekið á vanda spítalans tafarlaust með skýrari fyrirmælum um hvar og hvernig á að raga úr þjónustu sýnist ljóst að reksturinn verði í verulegu ójafnvægi á næsta ári og uppsafnaður halli aukist enn," segir í skýrslu Ríkisendurskoðunar.

Skýrsla Ríkisendurskoðunar