Í nýrri tölfræðiskýrslu ríkislögreglustjóra um afbrot kemur fram að á  árinu 2008 voru skráð 75.246 brot á öllu landinu sem er 4% fækkun frá árinu á undan.

Meðal annars var tilkynnt um 368 kynferðisbrot á árinu sem er 5% aukning frá fyrra ári og 18% aukning miðað við meðaltal áranna 2003 til 2007. 

Þá fækkaði fíkniefnabrotum um 14% en aldrei hefur verið lagt hald á jafn mikið magn fíkniefna eða 233 kg af hassi, 10,7 kíló af amfetamíni, 3885 e-töflur, 7,7 kíló af kókaíni og 6,6 kíló af maríjúana. Brotum vegna neyslu og vörslu fíkniefna fækkaði en brotum vegna framleiðslu efnanna fjölgaði.

Alls voru skráð 14.578 hegningarlagabrot, 56.401 umferðarlagabrot og 4267 sérrefsilagabrot. Hegningarlagabrotum fjölgaði um 12% milli ára en umferðarlagabrotum fækkaði um tæp 6% og sérrefsilagabrotum um 21%. Auðgunarbrotin voru 8029 sem er 30% aukning frá árinu áður. Innbrot jukust um 20% milli ára og þjófnaðir um 40%. Flest innbrot voru framin frá hádegi til kl. 18 eða 31%. Frá kl. 6 til kl. 18 voru framin 57% allra innbrota.

Ekkert manndráp kom til kasta lögreglu en þó lést einn einstaklingur af áverkum sem hann hlaut vegna afleiðinga af stórfelldri líkamsárás. Flestar slíkar árásir voru utandyra eða á skemmti- og veitingastöðum. Tvö tilvik voru um manndráp af gáleysi en um var að ræða afleiðingar umferðarslysa.

Fram kemur í skýrslunni, að þrátt fyrir fækkun umferðarlagabrota fjölgaði hraðaksturs­brotum en þau voru rúmlega 39.000 og hafa aldrei verið fleiri.