Stjórn VR samþykkti á fundi í vikunni að fela formanni að undirbúa almennan félagsfund í nóvember.

Tillögu fjögurra stjórnarmanna VR um félagsfund til þess eins að ræða aðild VR að Alþýðusambandinu var vísað frá á stjórnarfundinum á þeirri forsendu, að VR eigi ekki beina aðild að ASÍ sem og að félagsfundur geti ekki ákveðið að stjórn VR fái umboð til að yfirtaka þær starfsskyldur sem ASÍ gegni fyrir hönd VR.

Í tilkynningu segir Kristinn Örn Jóhannesson, formaður VR,  að félagsfundur mikilvægur liður í umræðum milli stjórnenda félagsins og félagsmanna um félagið og stöðu þess. Mikilvægt sé að félagsmenn ræði aðild VR að Landsambandi íslenskra verzlunarmanna  en ekki séu forsendur til að halda félagsfund um það efni eitt og sér.

Þá hafi félagsfundur ekki heldur ákvörðunarvald um úrsögn úr LÍV því til þess að úrsögn sé gild verði hún að hljóta samþykki 2/3 atkvæða í allsherjaratkvæðagreiðslu.

Kristinn segir, að staða VR í innan verkalýðshreyfingarinnar verði tekin fyrir í stefnumótunarvinnu félagsins sem sé að fara af stað, eins og öllum stjórnarmönnum hafi verið kunnugt um frá fyrstu fundum stjórnar í vor. Fagleg og vönduð umræða um málið verði að eiga sér stað áður en teknar verði afdrifaríkar ákvarðanir um framtíðina. Yfirlýsingar stjórnarmannanna fjögurra nú veki því upp spurningar um hvort markmið þeirra sé að reyna að þvinga fram afstöðu félagsmanna áður en umræða um málið hefst.

Fyrirhugað er að halda almennan félagsfund þann 30. nóvember þar sem félagsmenn geta rætt stöðuna í félaginu og þar með talið aðild VR að LÍV, stöðu efnahagsmála, komandi stefnumótun félagsins og hvaðeina sem þeim hugnast.