Frá slökkvistarfinu í morgun. mynd/Katarzyna Lewicka

Slökkvistarfi á Dalvík er að mestu lokið, en þar kviknaði í gömlu timburhúsi á fimmta tímanum í nótt. Húsið er gjörónýtt og verður að öllum líkindum rifið síðar í dag. Verið er að rannsaka eldsupptök og leikur grunur á að kveikt hafi verið í húsinu.

Húsið, sem heitir Bergþórshvöll, stendur við Goðabraut á Dalvík. Húsið er tæplega 100 ára gamalt og eitt fyrsta fjölbýlishúsið í bænum. Húsið er með risi og kjallara.

Sigurður Jónsson, slökkviliðsstjóri á Dalvík, segir að húsið sé gjörónýtt. Enn logi eldur á milli þilja, en hann segir að húsið hafi verið einangrað mikið með heyi og torfi. Ljóst sé að mikill eldsmatur var í húsinu.

„Það er reiknað með að það komi hingað gámar og húsið rifið í hvelli,“ segir hann í samtali við mbl.is. 

Sigurður segir að menn séu nú að kanna hvort kveikt hafi verið í húsinu. Það eigi eftir að koma ljós.

Mikinn reyk lagði í morgun yfir Dalvíkurbyggð og voru hús rýmd. Að sögn Sigurðar er íbúarnir nú aftur komnir heim til sín. 

Allt tiltækt slökkvilið fór á staðinn í morgun, en tilkynning barst um kl. 4:30. Húsið var mannlaust og rafmagnslaust. Engan sakaði og þá voru engin hús í nágrenninu í hættu.

Frá vettvangi á Dalvík í morgun. mynd/Katarzyna Lewicka

Slökkvilið að störfum á Dalvík í morgun. mynd/Katarzyna Lewicka