Héraðsdómur Reykjavíkur. mbl.is/Þorkell

Héraðsdómur Reykjavíkur hefur dæmt 37 ára gamlan karlmann í 10 mánaða fangelsi, þar af 7 mánuði skilorðsbundna, fyrir að stinga annan mann með hnífi í síðuna. Gerðist það í Bankastræti í Reykjavík fyrir réttu ári.

Maðurinn var einnig dæmdur fyrir fíkniefnabrot en hann var með 10 e-töflur í fórum sínum þegar lögreglan handtók hann.

Maðurinn sagðist hafa verið á leið niður Bankastræti þegar hópur stráka  umkringdu hann og, veittust að honum og slógu hann ítrekað í höfuðið.  Hann hefði orðið hræddur um líf sitt og tekið upp hníf sem legið hefði í götunni og otað honum frá sér. Í átökum hlyti hnífurinn að hafa stungist í síðuna á einum piltinum.

Héraðsdómur sakfelldi manninn fyrir sérlega hættulega líkamsárás og segir að tilviljun hafi ráðið því að ekki fór verr, en pilturinn, sem varð fyrir hnífnum, særðist ekki alvarlega.

Dómurinn taldi jafnframt óhætt að slá því föstu að maðurinn hefði sætt harkalegri áreitni og árásum hópsins áður en hnífnum var beitt.  Með hliðsjón af aðstæðum öllum yrði þó að telja að maðurinn hafi farið út fyrir takmörk leyfilegrar neyðarvarnar með því að beita hnífnum sér til varnar.