Góð reynsla hefur verið af því að hafa ókeypis í strætó í höfuðstað Norðurlands. Fljótlega verður einn vagninn knúinn af lífdísil. mbl.is/Skapti

Einn vagna SVA, Strætisvagna Akureyrar, verður í framtíðinni knúinn með lífdísil sem framleiddur verður í tilraunaverksmiðju Mannvits og Orkeyjar.

Formlegt samstarf við Akureyrarbæ hófst í dag þegar Hermann Jón Tómasson bæjarstjóri skrifaði undir viljayfirlýsingu um að bærinn styðji þetta verkefni með því að kaupa lífdísil á sínar bifreiðar og tæki frá lífdísilverksmiðju Orkeyjar sem mun taka til starfa um n.k. áramót.

Fyrirtækið Orkey ehf. var stofnað í febrúar árið 2007 og hefur síðan þá kannað ýmsa möguleika á framleiðslu lífdísils – jafnt úr erlendu sem innlendu hráefni, að því er fram kemur í frétt frá fyrirtækinu.

Á næstu mánuðum mun fyrirtækið hefja framleiðslu a.m.k. 300 tonna af lífdísil sem að mestu verður unninn úr úrgangssteikingarolíu og -feiti, en einnig öðrum úrgangi. Áætlað er að fyrst um sinn muni starfsemi Orkeyjar skapa 2-3 ársverk auk nokkrurra afleiddra starfa.

Verkfræðistofan Mannvit hefur veitt Orkey, allt frá stofnun, faglega ráðgjöf ásamt því að þróa og hanna framleiðsluferlið. Undanfarin misseri hefur farið fram tilraunaframleiðsla á lífdísil á rannsóknastofu Mannvits á Akureyri og hefur verkefnið m.a. verið styrkt af Vaxtarsamningi Eyjafjarðar. Tækjabúnaðurinn í verksmiðju Orkeyjar verður að stærstum hluta smíðaður á Akureyri.

Hluthafar Orkeyjar eru tólf taldins. Þeir eru Aura Mare, N1, Stofnverk, Tækifæri, Arngrímur Jóhannsson, Hafnarsamlag Norðurlands, Mannvit, Norðurorka, Brim, HB Grandi, Höldur og LÍÚ. „Tilgangur Orkeyjar er að stuðla að sjálfbærri framleiðslu og notkun endurnýjanlegra orkugjafa og mun fyrirtækið leitast við að taka þátt í framförum á því sviði,“ segir í tilkynningu frá Orkey.