Sundahöfn í Reykjavík. mbl.is/Golli

Héraðsdómur Reykjavíkur hefur dæmt Faxaflóahafnir sf. til að endurgreiða fyrirtæki, sem flytur inn áfenga drykki, hluta af vörugjöldum sem hafnirnar hafa lagt á áfengisflutninga. Taldi dómurinn að Faxaflóahafnir hefðu ekki sýnt fram á réttmæti þess að leggja hærri vörugjöld á áfenga drykki en gosdrykki.

Faxaflóahafnir innheimta vörugjöld af öllum vörum sem fluttar eru af skipsfjöl á land, úr landi á skipsfjöl eða úr einu skipi í annað. Samkvæmt gjaldskránni, sem gilti á árunum 2006 og 2007 var vörugjald, sem lagt var á áfenga drykki meira en tvöfalt hærra en vörugjald sem lagt var á óáfenga drykki. Þetta breyttist hins vegar árið 2008 og var í gjaldskrá fyrir það ár ekki lengur gerður greinarmunur á áfengum og óáfengum drykkjarvörum. 

Fyrirtækið HOB-vín höfðaði mál á hendur Faxaflóahöfnum og taldi að álagning vörugjaldanna hafi byggt á ólögmætum forsendum sem ekki samræmdust almennum reglum og kröfum íslensks stjórnsýsluréttar sem aðili í opinberum rekstri þurfi að gæta við töku þjónustugjalda.

Héraðsdómur tók undir þetta og segir m.a. í niðurstöðu dómsins, að fyrir liggi að hinn mikli verðmunur á milli vöruflokkanna hafi verið skýrður með því að reynt sé að raða vörum þannig í flokka að þær greiði svipaða prósentu af útsöluverði vöru af hverju tonni sem kemur í land.  Ekki liggur annað fyrir, sem skýrt geti, að áfengum drykkjum var raðað í annan gjaldflokk en óáfengum, en að þar hafi ráðið verðmæti vörunnar.

Taldi dómurinn að Faxaflóahafnir hafi því skort lagaheimild til að leggja hið umdeilda vörugjald á og dæmdi hafnirnar til að greiða HOB-vínum mismuninn á vörugjaldinu vegna óáfengra og áfengra drykkja þessi ár, samtals 774 þúsund krónur.

Gísli Gíslason, hafnarstjóri Faxaflóahafna, sagði að þeir væru að skoða málið. Ekki hefur verið tekin afstaða til þess hvort málinu verður áfrýjað.