Kvikmyndagerðarhópurinn í Makedóníu.

„Þegar menn gerðu sér grein fyrir því að með því að sýna þessa mynd þá væri mögulega hægt að líta svo á að við værum að blanda okkur í þessa nafnadeilu ríkjanna var ákveðið að hætta við,“ segir Urður Gunnarsdóttir, fjölmiðlafulltrúi utanríkisráðuneytisins, og vísar þar til myndarinnar A Name is a Name.

Um er að ræða nýja kvikmynd íslenska kvikmyndagerðarmannsins Sigurjóns Einarssonar sem til stóð að sýna á vegum sendiráðs Íslands í Washington. Myndin fjallar um ferðir Sigurjóns um Makedóníu og langvinna nafnadeilu Grikkja og Makedóníu um nafn síðast nefnda ríkisins. 

Í samtali við mbl.is staðfestir Urður að sendiráð Íslands hafi verið beðið um að sýna myndina og ætlað að verða við þeirri bón, enda vilji til þess að kynna íslenska menningu. Þegar athygli manna hafi verið vakin á innihaldið myndarinnar hafi sú ákvörðun verið tekin hjá íslenska utanríkisráðuneytinu að sýna ekki myndina ytra. 

Fjölmiðlar í Makedóníu fullyrða að grískir sendimenn hafi komið því á framfæri við íslenska sendiherrann að grísk stjórnvöld myndu beita sér gegn aðildarumsókn Íslands að Evrópusambandinu yrði myndin synd. 

Aðspurð kannaðist Urður ekki við slíka hótun. Hún sagðist heldur ekki þekkja tilurð þess að starfsmenn sendiráðsins vestanhafs hafi gert sér grein fyrir því að myndin varðaði nafnadeiluna.

„Aðalmálið í okkar huga var að blanda okkur ekki í þessa nafnadeilu,“ segir Urður og bætir við: „Það er ekkert leyndarmál að þetta er mjög viðkvæm deila og það vita allir hvar báðar þjóðir standa í þessari deilu og þess vegna var ákveðið að sýna ekki myndina í sendiráðinu.“

Heimasíða A Name is a Name