Meðal vinsælustu ferða Íslenskra fjallaleiðsögumanna eru ferðir á Hvannadalshnjúk

Ferðaskrifstofan Íslenskir fjallaleiðsögumenn fengu í dag umhverfisverðlaun Ferðamálastofu en 27 fyrirtæki  voru tilnefnd til verðlaunanna í ár. Verðlaunin eru veitt því fyrirtæki eða stofnun sem best þykir hafa staðið sig í umhverfismálum það árið.

Var það Katrín Júlíusdóttir, iðnaðarráðherra og ráðherra ferðamála, sem afhenti stjórnendum Íslenskra fjallaleiðsögumanna viðurkenninguna í dag.

Samkvæmt lögum um ferðamál og markmiðum ferðamálaáætlunar 2006-2015 ber Ferðamálastofu að sinna umhverfismálum á ýmsan hátt. Eitt af hlutverkum stofnunarinnar er að hvetja einstaklinga og fyrirtæki til ábyrgðar í umhverfismálum. Sem hluta af þessari viðleitni veitir Ferðamálastofa árlega umhverfisverðlaun og er þetta 15. árið sem þau eru veitt.

Á vef Íslenskra fjallaleiðsögumanna kemur fram að 1994 stofnuðu fjórir ungir fjalla- og leiðsögumenn fyrirtækið Íslenska Fjallaleiðsögumenn.
Markmið þeirra frá upphafi var að fara ótroðnar slóðir með innlenda sem erlenda ferðamenn, opna augu fólks fyrir fjallaferðum, stuðla að verndun viðkvæmrar náttúru norðurslóða og að auka gæði og fagmennsku í leiðsögn.

Íslenskir Fjallaleiðsögumenn fylgja umhverfismarkmiðum World Wildlife Fund fyrir ferðaþjónustu á heimskautasvæðum og hafa tekið þátt í samnorrænu umhverfissamstarfi FINECO varðandi sjálfbæra umgengni við náttúruna. Fyrirtækið hefur tekið virkan þátt í umræðu um náttúruvernd hérlendis sem erlendis og setið í stjórnum og ráðum sem varða umhverfisvernd og ferðamennsku.

Í ferðum Fjallaleiðsögumanna er hugmyndafræði „Leave No Trace Principles“ höfð í hávegum, en það eru leiðbeinandi umgengnisvenjur um sjálfbæra ferðamennsku á ósnortnum svæðum og miðar að því að draga úr óhjákvæmilegu álagi af völdum ferðamanna. Markmiðið er að þeir sem fylgja í spor Íslenskra Fjallaleiðsögumanna sjái ekki að þar hafi aðrir verið á ferð.
 
Íslenskir Fjallaleiðsögumenn fylgja umhverfisstefnu á skrifstofu og lager á sama hátt og úti í náttúrunni. Pappi, plast, málmar, fernur, gler, rafhlöður og lífrænt affall er endurunnið eða endurnýtt allt árið. Fyrirtækið nýtir sér almenningssamgöngur í 50-60% ferða sinna og er í góðu samstarfi við heimamenn, þar sem þeir starfa, varðandi ýmsa þjónustu, leiðsögn og gistingu. 

Upplýsingar um Íslenska fjallaleiðsögumenn

Ólöf Ýrr Atladóttir ferðamálastjóri; Sveinn Rúnar Traustason umhverfisstjóri Ferðamálastofu; Jón Gauti Jónsson, Elín S. Sigurðardóttir, Ester Ósk Traustadóttir, Leifur Örn ...