Júlíus Sigurjónsson

Mikill álagspunktur varð hjá lögreglunni á Selfossi um klukkan tvö í nótt. Eins og sagt hefur verið frá féll maður í húsgrunn á sumarhúsasvæði við Efra Langholt í Hrunamannahreppi um það leyti.

Sjö steypustyrktarjárn stungust inn í hann eða í gegnum hann og var hann í bráðri lífshættu. Hann hélt meðvitund megnið af tímanum þar til honum var komið í þyrlu en undir það síðasta hafði hann misst mjög mikið blóð og var mjög farið að draga af honum.

Maðurinn var fluttur með þyrlu til Reykjavíkur og hefur verið í aðgerð fram á morgun. Ekki er hægt að upplýsa um líðan hans að svo stöddu.

Á sama tíma var einn maður handtekinn í heimahúsi í Þorlákshöfn eftir deilur við kærustu sína. Hafði hann verið að ota hnífi að konunni og ógna henni, en að sögn lögreglu var hann einnig með gríðarstóra teygjubyssu á sér. Höfðu deilurnar þeirra á milli upphaflega sprottið upp vegna teygjubyssunnar. Maðurinn hafði einnig ógnað konunni með teygjubyssunni.

Um svipað leyti gekk maður einnig berserksgang á Hótel Hlíð í Ölfusi. Hann sló meðal annars í gegnum rúðu og skar sig á hendi. Sjúkrabíll var sendur á staðinn og hafði maðurinn róast þegar komið var á vettvang. Var hann fluttur á Selfoss til aðhlynningar.

Að lokum varð bílvelta á Suðurlandsvegi austan við Selfoss um þetta leyti. Ekki urðu slys á fólki þar en bílstjórinn missti stjórn á bílnum í hálku. Ekki var um ölvunarakstur að ræða.

Að sögn varðstjóra var á mörkunum að lögregla hefði mannskap til að sinna öllum þessum útköllum á svo stuttum tíma.