Árni Sæberg

Yfir helmingur matvöruverslana á höfuðborgarsvæðinu var með mikið ósamræmi milli hillu- og kassaverðs í könnun á ástandi verðmerkinga, sem Neytendastofa  gerði hjá matvöruverslunum á höfuðborgarsvæðinu.

Farið var í 72 matvöruverslanir sem reknar eru af 10 verslunarkeðjum. Af þessum 72 verslunum var tæplega helmingur með verðmerkingar í góðu lagi. Samræmi milli hillu- og kassaverðs var  ábótavant hjá 37 verslunum.  Bæði var um að ræða að verð væri hærra og lægra á kassa miðað við hillumerkingar.

Neytendastofan segir, að Krónan við Reykjavíkurveg hafi verið með áberandi slæmar verðmerkingar en tæplega helmingur af þeim vörum, sem skoðaðar var, hafi verið með rangt verð eða ekki verðmerktar. 

Fjórar verslanir voru með algjört samræmi milli hillu- og kassaverðs, Þín verslun Seljabraut og svo þrjár verslanir 10-11, í Austurstræti, Barónstíg og Eggertsgötu. 

Neytendastofa segir, að verð á vörum sé mikilvægur þáttur í ákvörðun neytenda um að eiga viðskipti auk þess sem verð skipti miklu máli við ákvörðun um það í hvaða verslun varan sé keypt. Því sé mjög mikilvægt að verslanir fylgi þeim lögum og reglum sem um verðmerkingar gilda og merki allar vörur með skýrum hætti.

Neytendastofa mun halda áfram verðmerkingaeftirliti sínu og gera athugun hjá fleiri fyrirtækjum.  Neytendur geta komið ábendingum á framfæri í gegnum rafræna Neytendastofu á vefslóðinni www.neytendastofa.is.