Ráðhús Reykjavíkur. mbl.is/Sverrir

Á fundi velferðarráðs í dag kynntu fulltrúar meirihlutans í borgarstjórn, Sjálfstæðis- og Framsóknarflokks, lækkun á hagræðingarkröfu á sviðið sem þýðir að sviðið hefur um 110 milljónum meira fjármagn til ráðstöfunar en áður var gert ráð fyrir.

Fagna því að fulltrúi VG komi hreint fram

„Þannig er enn frekar tillit tekið til þeirrar sérstöðu sem sviðið hefur. Áréttað skal að í stærstu útgjaldaliði sviðsins, fjárhagsaðstoð og húsaleigubætur verður veitt því fjármagni sem til þarf enda eru hvort tveggja bundnir liðir. Gert er ráð fyrir að útgjöld til þeirra beggja hækki á næsta ári.

Meirihlutinn fagnar því að fulltrúi Vinstri grænna í velferðarráði skuli koma hreint fram og krefjast skattahækkana frekar en sparnaðar. Það er í línu við stefnu Vinstri grænna sem birtist í skattahækkunum ríkisstjórnarinnar. Meirihlutinn í velferðarráði telur brýnt að nýta alla möguleika til sparnaðar áður en gripið er til skattahækkana og fagnar því hversu vel hefur tekist til við gerð fjárhagsáætlunar," að því er fram kemur í fréttatilkynningu.

Fulltrúar meirihluta vilja þakka sviðsstjóra og starfsmönnum Velferðarsviðs fyrir mikla og góða vinnu við gerð fjárhagsáætlunar á þessum erfiðu tímum.  
Forsendur fjárhagsáætlunar taka mið af þeirri skýru línu borgarstjórnar um að standa vörð um grunnþjónustuna, hækka ekki skatta, hækka ekki gjaldskrár og standa vörð um störfin þrátt fyrir þá hagræðingu sem nauðsynlegt er að ná fram.  Gerð er minni hagræðingarkrafa á Velferðarsvið en önnur svið borgarinnar og þannig tekið tillit til þeirrar sérstöðu sem sviðið hefur á þessum tímum, samkvæmt tilkynningu.