Steingrímur J. Sigfússon. mbl.is/Golli

Steingrímur J. Sigfússon, fjármálaráðherra, sagði að ekkert bendi til annars en neyðarlögin, sem sett voru fyrir rúmu ári, haldi enda vandséð, hvers vegna Ísland, sem fullvalda ríki, mátti ekki grípa til varna fyrir sjálft sig þegar ljóst var hvernig komið var í október 2008.

Hins vegar sé nægur tími til stefnu, fari svo að dómstólar telji að neyðarlögin haldi ekki því málaferli yrðu langvinn og flókin. Það sem nú þurfi að gera sé að undirbúa varnir og málflutning íslenska ríkisins fari svo að sótt verði að því, „þar á meðal að við höfum okkar færustu lögmenn okkar megin víglínunnar til að verja okkur og ríkið en ekki sækja á okkur fyrir hönd einhverra erlendra aðila," sagði Steingrímur.

Steingrímur var að svara fyrirspurn frá Eygló Harðardóttur, þingmanni Framsóknarflokksins, um það hvort stjórnvöld hefðu undirbúið varaáætlun ef svo færi að neyðarlögunum verði hnekkt. Vísaði Eygló m.a. til þess að Stefán Már Stefánsson, prófessor, og Ragnar Aðalsteinsson, lögmaður, hafi lýst áhyggjum varðandi neyðarlögin. 

Steingrímur sagði að eftir því sem Íslendingar geri fleiri samninga um lyktir mála sem tengjast fjármálahruninu, þeim mun minni líkur verði á, að Íslendingar mæti öflugum aðilum, sem vilji láta reyna á gildi neyðarlaganna.  Því væri gríðarlega mikilvægt að ljúka endurreisn allra stóru bankanna í samkomulagi við þá, sem við er að semja.