mbl.is/RAX

Héraðsdómur Reykjavíkur hefur sýknað Landspítala af bótakröfu manns, sem féll í hver í Reykjadal nálægt Hveragerði árið 2003 og brenndist mikið. Maðurinn var í hópi unglinga, sem tók þátt í ævintýraferð á vegum iðjuþjálfunar barna og unglingageðdeildar spítalans.

Fjórir starfsmenn BUGL voru leiðbeinendur unglinganna, gættu þeirra og skipulögðu ferðina. Gengið var í Reykjadal frá Hvera­gerði og tjaldað nálægt Klambragili við mörk tveggja lækja þar sem heitur lækur rennur út í kalda bergvatnsá. Að loknu baði í lækjarmótunum var ákveðið að fara í stutta gönguferð inn Klambragilið en þar er göngustígur sem liggur ofan við heita lækinn, sömu megin og tjaldbúðirnar, en þó hvergi nálægt læknum fyrr en mun ofar. Allir leiðbeinendurnir fóru í þessa gönguferð með unglingunum en umræddur piltur varð eftir í tjaldi sínu ásamt tveimur öðrum unglingum.

Pilturinn hélt hins vegar á eftir hópnum inn gilið og féll þá í hver sem þar var. Hann höfðaði bótamál gegn Landspítala og krafðist 6,5 milljóna króna í bætur. Sagðist hann hafa viljað fara með í gönguferðina en starfsmennirnir skilið hann eftir. Því bar sjúkrahúsið á móti og sagði, að þeir unglingar sem voru þreyttir og vildu ekki fara með hafi fengið að verða eftir í tjöldunum til þess að hvíla sig, þar á meðal pilturinn. 

Héraðsdómur komst að þeirri niðurstöðu, að pilturinn væri einn til frásagnar um málsatvikin en eins og hann lýsi þeim verði að líta svo á að fall hans í hverinn hljóti að hafa verið slys sem engum verði kennt um. Tjón hans verði því ekki rakið til saknæmrar háttsemi starfsmanna BUGL.