Loftsteinaregn yfir landinu
Loftsteinar eru tilkomumikil sjón. AP
Í ljós hefur komið, að margir loftsteinar féllu til jarðar um miðjan nóvember og sást loftsteinaregnið víða um land. Í athugun Þorsteins Sæmundssonar, stjörnufræðings, kom í ljós að sex vígahnettir sáust brenna upp sama kvöldið.
Steinaregnið sást á himni laugardaginn 14. nóvember. Sagt var frá því á mbl.is að loftsteinn hefði sést yfir Suðurlandi og í kjölfarið komu lýsingar fleiri sjónarvotta fram. Þorsteinn hafði samband við marga til að reyna að ákvarða hvar loftsteinninn hefði fallið og varð fljótlega ljóst að um fleiri en einn loftstein var að ræða.
Sá bjartasti, sem flestir sáu, virðist hafa fallið kl. 17:34. Honum er lýst sem skærri, hvítri ljóskúlu sem sprakk að lokum í nokkra hluta sem voru gulleitir og minntu á flugeld. Þessu var einnig lýst þannig að kvarnast hefði úr steininum og brotin dregist aftur úr. Rákir fylgdu á eftir brotunum, en hurfu skjótt. Segir Þorsteinn á vef Almanaks Háskóla Íslands, að eftir því sem næst verði komist hafi steinninn stefnt frá vestri til austurs og fallið á að giska 150 km í suðaustur frá Vestmannaeyjum.
Einnig virðist annar loftsteinn hafa sést á sama tíma í Borgarfirði og miðað við lýsingu sjónarvotta féll sá steinn fyrir austan land.
Þriðji loftsteinninn birtist skömmu eftir kl. 18. Sjónarvottar í Reykjanesbæ sáu bjartan, gulan loftstein fara nær lárétt yfir himin frá suðri til suðausturs. Í kjölfarið fylgdi dökkur reykur sem hvarf skjótt. Steinninn sást í 5 sekúndur eða svo.
Fjórði steinninn sást á Suðurlandi um kl. 18:15. Hann var mun skærari en nokkur stjarna og hvarf suður fyrir land, en stefnan var hallandi frá austri til vesturs, gagnstætt stefnu fyrri steinanna. Tveir sjónarvottar lýstu fyrirbærinu, annar í Flóanum en hinn í Fljótshlíð.
Fimmta loftsteininum er svo lýst að hann hafi verið geysibjartur, bláhvítur með langan hala. Hann sást falla kl. 21:21 lóðrétt í norð-norðvestri frá Reykjavík.
Sjötti loftsteinninn sást eftir miðnætti um kl. 00:30. Hann sást frá Barðaströnd og er lýst sem ljóskúlu með hala og að kúlan hafi sprungið. Ljósið stefndi frá norðaustri til suðvesturs. Einn sjónarvottur er til vitnis um þetta fyrirbæri.
Leitt hefur verið líkum að því, að loftsteinaregnið hafi tengst svonefndum Leonítum, drífu loftsteina sem jörðin mætir um þetta leyti árs. Annað loftsteinaregn sást að morgni þriðjudagsins 17. nóvember og segir Þorsteinn, að sjónarvottar í Reykjavík, Biskupstungum og á norðanverðu Snæfellsnesi hafi þá séð afar bjarta loftsteina. Sá bjartasti lýsti upp jörð í Biskupstungum. Sá var á norðurhimni, stefndi til norðurs og skildi eftir sig bjarta rák sem varði í 10-20 sekúndur. Þetta var um kl. 7:20. Fimm mínútum síðar sáu sjónarvottar í Reykjavík og á Snæfellsnesi bjartan loftstein falla á austurhimni skáhallt frá suðri til norðurs.
Þorsteinn segir á vef Almanaks HÍ að það sé áreiðanlega einsdæmi, að tilkynnt sé um sex vígahnetti á sjö klukkustundum eins og gerðist 14.-15. nóvember. Ef steinarnir hefðu komið úr einni og sömu átt hefði mátt skýra þetta með því að jörðin væri að fara í gegnum áður óþekkt loftsteinabelti. En því hafi ekki verið að heilsa því steinarnir komu úr ýmsum áttum. Skilyrði til athugana hafi vissulega verið góð þetta kvöld, sérstaklega sunnan- og vestanlands, og fréttin á Morgunblaðsvefnum sjálfsagt ýtt undir sjónarvotta að gefa sig fram. Það nægi samt tæpast til að skýra allan þennan fjölda bjartra loftsteina.
