Fimmtán þúsund manns hafa nú skrifað undir áskorun til þingmanna um að falla frá ráðagerðum heilbrigðisráðuneytisins um skerðingu framlaga til sjúkrahúsrekstur SÁÁ.

Í áskoruninni kemur fram að SÁÁ hafi þegar mátt þola skerðingu tekna vegna minni framlaga frá einstaklingum og fyrirtækjum í kjölfar hrunsins. Skerðing á framlagi á fjárlögum myndi því leiða til þess að SÁÁ þyrfti að skerða þjónustu sína mun meira en ríkisstofnanir í heilbrigðisþjónustu.

Að sögn Þórarins Tyrfingssonar, formanns SÁÁ og yfirlæknis, missti SÁÁ tekjur frá einstaklingum og fyrirtækjum við efnahagshrunið á síðasta ári. Við því hafi verið brugðist með því að skera strax allt utan af rekstrinum og skrúfa fyrir fjárfestingar og viðhald. Hann bendir á að skerðist tekjur SÁÁ enn meira þurfi forsvarsmenn samtakka að skera niður sjúkrahúsreksturinn og það muni fyrst og fremst bitna á veikasta fólkinu.

Í áskoruninni kemur einnig fram að margar rannsóknir sýni að meðferð áfengis- og fíkniefnasjúklinga leiði til margfalds sparnaðar á öðrum sviðum samfélagsins, svo sem hjá öðrum heilbrigðisstofnunum, félagsþjónustu og löggæslu. Skerðing á framlögum til meðferðar við áfengis- og vímuefnafíkn sé því í raun enginn sparnaður heldur ill meðferð fjármuna.