Eftirspurn nemenda eftir stoðþjónustu framhaldsskóla hefur aukist í tæplega helmingi framhaldsskóla frá því að kreppan skall á og ber mest á fleiri heimsóknum til náms- og starfsráðgjafa. Hins vegar hefur skólasókn ekki versnað og vímuefnaneysla ekki aukist. Þetta er niðurstaða rafrænnar könnunar sem menntamálaráðuneytið gerði meðal skólameistara framhaldsskóla í byrjun október.

Fram kemur að skólasókn nemenda er óbreytt eða hefur batnað í langflestum skólum, eða hjá 86% þeirra, hvergi töldu skólameistarar að þátttaka nemenda í félagslífi skólans hefði minnkað frá í fyrra og langflestir töldu að áfengis- og vímuefnaneysla nemenda væri óbreytt eða hefði minnkað eða í yfir 90% skóla.

Í vefriti menntamálaráðuneytisins kemur fram að alls fengu 30 framhaldsskólar sendan spurningalista og í lok október höfðu svör borist frá þeim öllum.

Tilgangurinn með könnuninni var að fanga það andrúmsloft sem ríkir meðal nemenda í framhaldsskólum að mati skólastjórnenda og samstarfsfólks þeirra. Ætlunin er að gera sambærilega könnun einu sinni á skólaönn, þ.e. tvisvar á ári. Að auki verður hefðbundin tölfræði skoðuð og fyglst með brottfalli o.fl. þáttum. Komi óæskileg þróun í ljós mun ráðuneytið bregðast við því á viðeigandi hátt.

Skólameistarar voru beðnir að leggja mat á stöðuna í sínum skóla miðað við stöðuna fyrir ári síðan.

Athygli vekur að áhersla framhaldsskóla á samvinnu í nærsamfélagi hefur aukist í um helmingi skólanna og ber þar hæst að foreldraráð eru virk í þeim skólum, aukin samvinna er við heilsugæslustöðvar, félagsmiðstöðvar, lögreglu og þjónustumiðstöðvar, að því er segir í vefriti ráðuneytisins.

Skýrslan í heild