mbl.is/Golli

Fyrir jólin í ár starfrækja Hjálparstarf kirkjunnar,  Mæðrastyrksnefnd Reykjavíkur og Reykjavíkurdeild Rauðakross Íslands sérstaka gjafadeild þar sem einstaklingar geta nálgast jólagjafir fyrir börn sín. Nú eins og áður eiga margir einstaklingar og fjölskyldur um sárt að binda og þurfa að nýta sér aðstoð hjálparstofnana bæði vegna matar og gjafa fyrir jólin. Framlög einstaklinga skipta því sköpum þegar kemur að framboði gjafa og því eru öll framlög vel þegin, að því er segir í tilkynningu.

Stjórn Starfsmannafélags Íslandsbanka hefur ákveðið að styðja við þetta framtak og hvetur alla viðskiptavini bankans og starfsmenn til að gefa gjafir til handa börnum í söfnunina. Gjöfum verður safnað saman í útibúum Íslandsbanka um allt land þar sem boðið er upp á aðstöðu til innpökkunar. 

Starfsmenn eru hvattir til að sýna gott fordæmi og hvetja einnig viðskiptavini til að koma með gjafir í næsta útibú bankans. Starfsmannafélagið mun koma gjöfum frá stafsmönnum og viðskiptavinum áleiðis til Hjálparstarfs kirkjunnar og Mæðrastyrksnefndar. Útibú Íslandsbanka á landsbyggðinni safna saman gjöfum sem dreift verður til þeirra sem þess þurfa innan hvers bæjarfélags í samstarfi við tengiliði Hjálparstarfs kirkjunnar og Mæðrastyrksnefndar.