Ómar Óskarsson

Ekkert bendir til þess að skuldahlutfall hins opinbera sé að breytast svo neinu nemi, nema til lækkunar, sagði Steingrímur J. Sigfússon fjármálaráðherra á Alþingi í morgun, í umræðum um störf þingsins.

Eygló Harðardóttir, þingmaður Framsóknarflokksins, vakti máls á því að nú væri ekki lengur talið að skuldir þjóðarbúsins væru 310% af landsframleiðslu, heldur væri nú talað um 350%.

Gerði hún því skóna að ráðherrann hefði verið illa upplýstur eða að segja ósatt í umræðum á þinginu í gær, um þetta sama mál. Sagði Eygló að aðeins eitt þróað hagkerfi væri með hærra skuldahlutfall hins opinbera en Ísland, og það væri Japan. „Er Japan eitthvað sem við viljum líkja eftir?" spurði Eygló.

Steingrímur svaraði því til að það væri mikill ábyrgðarhlutur að hlaupa með óstaðfestar upplýsingar um svona mál í fjölmiðla og gefa sér það svo að landið sé á leið í greiðsluþrot. Tiltók hann að endurreisn bankanna hefði reynst miklu ódýrari en upphaflega hefði verið talið. Þar að auki ætti eftir að ná endanlega utan um heildarskuldir einkageirans.

„Það mun ekki skýrast endanlega hvað eftir stendur í íslenska bókhaldinu, þegar úrvinnslu mála og skiptum ónýtra eignarhaldsfélaga verður lokið," sagði Steingrímur. Lengi hefði legið fyrir að óvissa væri um það hvernig skuldir einkaaðila yrðu endanlega eftir hrunið. „Stórir hlutar þeirra skulda varða ekki íslenska ríkið eða greiðslugetu íslenska þjóðarbúsins," bætti hann við og vísaði í skuldir stórra útrásarfyrirtækja sem hefðu starfsemi sína mest erlendis og væru fjármögnuð af erlendum bönkum.

Vísaði hann meðal annars í heildarskuldir lyfjafyrirtækisins Actavis, sem nema um 70% af landsframleiðslu Íslands.

„Það eru ekki tölur sem við þurfum að hafa áhyggjur af. Það eru skuldir hins opinbera og innlendra fyrirtækja sem við þurfum að standa á bak við," sagði Steingrímur.