Alþjóðahúsið Laugavegi

Katla Þorsteinsdóttir, stjórnarformaður Alþjóðahússins, hefur ákveðið að láta af starfinu sem og störfum fyrir Kosmos ses. Katla er einnig framkvæmdastjóri Reykjavíkurdeildar Rauða krossins. Segir hún umfangs starfsins fyrir Alþjóðahúsið hafa verið mun meira en hún hafi sjálf óskað. Þetta kemur fram í yfirlýsingu sem Katla hefur sent á fjölmiðla.

Í fréttum Stöðvar 2 í gærkvöldi kom fram að starfsmenn Alþjóðahúss voru ósáttir við að stjórnin kom í veg fyrir að lögfræðingur yrði ráðin til starfa eins og nauðsyn var að þeirra mati. Katla, sem var stjórnarformaður, þáði laun fyrir 50% vinnu í Alþjóðahúsi þrátt fyrir að hún væri í 100% starfi annars staðar, en hún er framkvæmdastjóri hjá Rauða Krossinum.

„Ég undirrituð, Katla Þorsteinsdóttir, vil koma á framfæri eftirfarandi yfirlýsingu vegna fréttar á Stöð2 í gærkvöldi. Ég harma þá tengingu sem fram kom í fréttinni milli starfa minna fyrir Alþjóðahúsið og Kosmos ses annars vegar og Rauða krossins í Reykjavík hins vegar. Vegna þessa hef ég ákveðið að hætta öllum afskiptum af Alþjóðahúsinu og Kosmos ses. og mun ég ganga frá því formlega strax eftir helgi.

Í tilefni af þessu vil ég að það komi fram að umfang starfa minna fyrir Alþjóðahúsið á þessu ári varð miklu mun meira en til stóð og ég sjálf óskaði. Um áramótin 2008/2009 sagði framkvæmdastjóri upp störfum og óskaði þegar lausnar þar sem hann hafði þá ráðið sig í annað starf. Á þessum tíma voru þjónustusamningar við  sveitarfélögin á höfuðborgarsvæðinu lausir og félagið rekið með 20 milljón króna halla árið 2008. Það voru því engar forsendur að mati meirihluta stjórnar að auglýsa og ráða framkvæmdastjóra. Ákveðið var að ég tæki að mér hluta af lögfræðiráðgjöf og úrvinnslu og lögfræðingur fyrirtækisins tæki stól framkvæmdastjóra. Unnið var að drögum um nýjan þjónustusamning við Reykjavíkurborg en undirskrift hans dróst til 7. júlí. Frá 28. desember 2008 hafði ég þó hverja viku ástæðu til að ætla að undirritun færi fram innan fárra daga og unnt yrði að skipuleggja reksturinn og auglýsa lausar stöður.

Ætlun mín var aldrei sú að sinna starfi hjá Alþjóðahúsi að því marki eða svo lengi sem raun varð, heldur var það ætlun mín að bjarga málum þar til staðan væri ljós. Mér láðist þennan tíma að gera stjórn Reykjavíkurdeildar Rauða krossins grein fyrir umfangi starfa minna fyrir Alþjóðahús. Mér þykir það mjög miður. Eins þykir mér afskaplega miður að vita afstöðu fyrrverandi starfsmanna Alþjóðahúss, en mér var hún ekki ljós nema að litlum hluta. Eins og áður sagði hef ég ákveðið að hætta alfarið störfum fyrir Alþjóðahúsið. Ég óska þess innilega að borgaryfirvöld taki skjóta ákvörðun varðandi framtíð hússins, en stjórn Alþjóðahúss hefur lagt til þrjár tillögur um lausnir. Vona ég að brotthvarf mitt verði til þess að skapa frið um þjónustu við innflytjendur en hún er aðalatriðið í þessu máli.“

Katla Þorsteinsdóttir mbl.is/Ásdís Ásgeirsdóttir