Sjúkraúsið Vogur Árni Sæberg

18.200 manns hafa skrifað undir áskorun til þingmanna um að hafna ráðagerðum um skerðingu á framlögum til áfengis- og fíkniefnameðferðar á vegum SÁÁ. Söfnun undirskrifta fer fram á vef SÁÁ.

„Við treystum því að þingmenn taki tillit til afstöðu þessa fólks. Þetta fólk biður ekki um mikið, aðeins að fyrirhuguð 70 milljón króna skerðing á framlögum til sjúkrahúsreksturs SÁÁ verði dregin til baka,” segir Þórarinn Tyrfingsson, formaður og yfirlæknir SÁÁ, í tilkynningu frá samtökunum.
 
Þórarinn segir að þótt 70 milljónir séu ekki há upphæð þá muni slík skerðing á framlagi ríkisins eyðileggja áfengis- og fíknimeðferð hjá SÁÁ. „Vegna samdráttar í framlögum fyrirtækja og einstaklinga í fyrra skárum við niður allt sem hægt var að skera niður hjá SÁÁ. Frekari niðurskurður mun rústa okkar starfi og þar með bitna helst á þeim sem veikastir eru,“ segir Þórarinn.
 
Samhliða söfnun undirskrifta hafa samtökin gefið út nýtt SÁÁ-blað, sem liggur frammi á fjölförnum stöðum. Í blaðinu rifjar þjóðkunnugt fólk upp mikilvægi starfs SÁÁ og ákallar stjórnvöld um að standa vörð um það sem vel er gert í heilbrigðisþjónustunni á Íslandi.

Meðal þeirra sem skrifa í blaðið eru Ólafur Ragnar Grímsson forseti Íslands og Vigdís Finnbogadóttir fyrrverandi forseti Íslands, ritstjórarnir fyrrverandi Styrmir Gunnarsson og Jónas Kristjánsson og séra Pálmi Matthíasson og Bubbi Morthens tónlistarmaður.

Undirskriftasöfnun SÁÁ