Vildu sýna fram á að Ísland væri að vinna að Icesave-lausn
Indriði H. Þorláksson. Eggert Jóhannesson
Fjármálaráðuneytið segir, að tilgangur tölvupóstsendingar Indriða H. Þorlákssonar, þáverandi ráðuneytisstjóra, til Marks Flanagans, starfsmanns Alþjóðagjaldeyrissjóðsins, í apríl hafi meðal annars verið að sýna fram á að af Íslands hálfu væri verið að vinna að lausn á málinu sem legið hafði niðri um langa hríð.
Hins vegar hafi verið ætlunin að fá mat sjóðsins á þeirri nýju nálgun í samningaviðræðunum við Breta og Hollendinga, sem unnið hafði verið og stuðning við hana ef til slíks gæti komið. Til að undirstrika það hafi verið bent á að samningar samkvæmt fyrri hugmyndum væru óaðgengileg lausn fyrir Ísland. Í svari sjóðsins komi fram að þótt starfsmenn hans geti ekki haft bein afskipti af samningunum hafi þeir talið tillögur Íslands færa leið.
Þetta kemur fram í tilkynningu frá fjármálaráðuneytinu þar sem fjallað er um tölvupóstsamskipti Indriða. Segir þar m.a. að viðræður við Alþjóðagjaldeyrissjóðinn um endurskoðun á áætlun sjóðsins hafi farið fram nokkru áður. Þar var farið yfir hvernig miðað hefði með þau efnisatriði sem tiltekin voru í samkomulaginu við sjóðinn. Samningar við Breta og Hollendinga voru þar á meðal og því þótti rétt að gera sendinefnd sjóðsins grein fyrir stöðu þess.
Gagnrýnt hefur verið, að Indriði tilgreindi einkatölvupóstfang sitt í póstinum til Flanagan. Fjármálaráðuneytið segir, að Indriði hafi gert þetta vegna þess að hann var á förum til Kaupmannahafnar daginn eftir og taldi að hann ætti auðveldara aðgengi að væntanlegu svari með þeim hætti.
„Skeytið til Mark Flanagan var sent úr tölvupóstkerfi stjórnarráðsins og reyndin var sú að svarskeytið barst einnig þangað og eru vistuð þar. Þá voru afrit(cc.) af skeyti Indriða H. Þorlákssonar og svari Mark Flanagan sent á embættisnetföng fjármálaráðherra, formann samninganefndarinnar auk starfsmnanns hennar. Engin hætta var á því að samskiptin færu fram hjá skjalakerfi ráðuneytisins," segir í tilkynningu ráðuneytisins.
