. mbl.is/Brynjar Gauti

Hæstiréttur hefur staðfest úrskurði Héraðsdóms Reykjavíkur um að tvær konur, sem grunaðar eru um mansal og vændisstarfsemi, sæti gæsluvarðhaldi til 11. desember. Önnur konan er rúmlega tvítug og hin rúmlega þrítug.

Önnur konan, Catalina Mikue Ncogo, var í byrjun desember dæmd í 2½ árs fangelsi fyrir  innflutning fíkniefna og hagnýtingu vændis, en sýknuð af ákæru um mansal. 

Fram kemur í úrskurðum héraðsdóms að lögregla hafi byrjað rannsókn á ætluðu mansali og milligöngu um vændi á grundvelli ítrekaðra upplýsinga þess efnis að konurnar flyttu stúlkur til landsins, gerðu þær út til vændis og tækju hluta hagnaðarins af þeim. 

Í október hafi lögregla ítrekað fengið nafnlausar ábendingar þess efnis að nokkrar konur stunduðu vændi á heimili Catalinu og að þjónustan væri auglýst á netinu. Lögreglan kannaði þessar auglýsingar en í þeim eru myndir af hálfnöktum konum og vísbendingar um að hægt sé að hringja í símanúmer þeirra til að fá kynlíf.

Þá fékk lögregla upplýsingar um að nokkrar konur hafi komið til landsins til að stunda vændi á vegum Catalinu. Einnig komií ljós að sérstakt húsnæði hafði verið tekið á leigu undir vændisstarfsemina. Lögreglan tók fyrir nokkru framburðarskýrslu af einni þessara kvenna og hún lýsti þar  bágum aðstæðum.

Yngri konan, sem handtekin var, er grunuð um að hafa tekið virkan þátt í þessum lögbrotum, m.a. með því að koma að skipulagningu vændisstarfseminnar, hafa milligöngu um hana og hafa viðurværi sitt af vændi annarra.