Catalina var í byrjun desember dæmd í 2½ árs fangelsi fyrir hórmang. mbl.is/Árni Torfason

Héraðsdómur Reykjavíkur féllst í dag á kröfu lögreglustjóra höfuðborgarsvæðisins um að Catalina Mikue Ncogo sæti áframhaldandi gæsluvarðhaldi til 22. desember nk. Annarri konu sem einnig var handtekin vegna málsins hefur verið sleppt úr haldi.

Catalina var í byrjun desember dæmd í 2½ árs fangelsi fyrir  innflutning fíkniefna og hagnýtingu vændis, en sýknuð af ákæru um mansal. Í október fékk lögregla ítrekað fengið nafnlausar ábendingar þess efnis að nokkrar konur stunduðu vændi á heimili Catalinu og að þjónustan væri auglýst á netinu.

Lögreglan kannaði þessar auglýsingar en í þeim eru myndir af hálfnöktum konum og vísbendingar um að hægt sé að hringja í símanúmer þeirra til að fá kynlíf.

Lögregla fékk einnig upplýsingar um að nokkrar konur hafi komið til landsins til að stunda vændi á vegum Catalinu. Einnig komi í ljós að sérstakt húsnæði hafði verið tekið á leigu undir vændisstarfsemina.

Að sögn Friðriks Björgvinssonar, yfirmanns rannsóknardeildar lögreglu höfuðborgarsvæðisins, þótti ekki ástæða til að halda annarri konu sem handtekin var vegna málsins. Henni var sleppt í gærkvöldi. 

Friðrik segir rannsókn málsins miða vel en sé þó hvergi nærri lokið. Að minnsta kosti þrjár aðrar konur koma við sögu í málinu en þær eru taldar hafa lagt stund á vændi. Konurnar  eru allar á fertugsaldri og af erlendu bergi brotnar. Mál einnar þeirrar er jafnframt rannsakað sem mansalsmál en konurnar þrjár hafa verið færðar til skýrslutöku hjá lögreglu.

Rannsóknin tekur einnig til þeirra sem keyptu kynlífsþjónustuna sem veitt var og hafa nokkrir verið yfirheyrðir vegna þessa.