Fundarsalur borgarstjórnar Reykjavíkur. mbl.is/Brynjar Gauti

Fjárhagsáætlun Reykjavíkurborgar fyrir árið 2010 var afgreidd á fundi borgarstjórnar sem lauk klukkan 23.20 í kvöld. Er þar gert ráð fyrir hallalausum rekstri borgarsjóðs.

Í tilkynningu frá skrifstofu borgarstjóra segir, að samdrætti í tekjum borgarinnar verði mætt með hagræðingu í rekstri, án þess að hækka skatta eða gjöld á grunnþjónustu. Þannig verði náms- og fæðisgjöld í leikskólum óbreytt á árinu 2010 auk þess sem 100% systkinaafsláttur verður áfram í gildi. Verð á skólamáltíðum í grunnskólum hækki ekki og gjaldskrár frístundaheimila verði óbreyttar. Þá sé ekki gert ráð fyrir þjónustuskerðingu í skólum borgarinnar.

Með fjárhagsáætluninni sé  forgangsraðað í þágu barna og velferðar án þess að hækka skatta eða gjöld vegna grunnþjónustu. Engin hagræðingarkrafa sé gerð á velferðarsvið og útgjöld til velferðarmála aukist um tæpan 1 milljarð króna milli áætlana 2009 og 2010 eða um 11%.

Þá sé mun lægri hagræðingarkrafa gerð á menntasvið, leikskólasvið og íþrótta- og tómstundasvið en á miðlæga stjórnsýslu og þau svið Reykjavíkurborgar sem annast framkvæmdir, skipulag og umhverfismál.  

Í bókun, sem Samfylkingin lagði fram á fundinum í kvöld segir m.a. að fjárhagsáætlunin einkennist af því að borgarstjórnarkosningar séu framundan. Í stað þess að taka á málum af festu ýti meirihlutinn vanda fyrirtækja borgarinnar og óútfærðum niðurskurði fram yfir kosningar.

Augljóst sé að undirliggjandi séu áform um gjaldskrárhækkanir og aðrar ákvarðanir sem viljandi sé skotið á frest. Sömu sögu sé að segja um umfangsmikinn niðurskurð sem vísað sé út í stofnanir, skóla og þjónustu í hverfunum. Mun minni niðurskurður sé fyrirhugaður þegar yfirbygging málaflokkanna er annars vegar.