Fyrsta sameiginlega úthlutun og jólaaðstoð Hjálparstarfs kirkjunnar, Mæðrastyrksnefndar Reykjavíkur og Reykjavíkurdeildar Rauða krossins fer fram í dag. Alls hafa 3.084 sótt um aðstoð á landinu öllu fyrir jólin, 1.975 konur og 1.109 karlmenn. Þess ber að geta að inn í þessar tölur vantar upplýsingar frá Norðausturlandi. Tæplega 80% þeirra sem þurfa jólaaðstoð búa á höfuðborgarsvæðinu, næstflestir eða 12% á Suðurlandi.

Samkvæmt upplýsingum frá þeim sem standa að sameiginlegu úthlutuninni sýnir reynsla síðustu ára að gera megi ráð fyrir að um 500 umsóknir til viðbótar eigi eftir að berast fyrir jólin. Mikil aukning er í fjölda hjálparbeiðna, þannig bárust rúmlega 800 nýskráningar fyrir þessi jól en í fyrra voru þær 260.

Sé rýnt í aldursdreifingu þeirra sem þurfa að leita sér aðstoðar má sjá að flestir eru á aldrinum 20-59 ára. Á fjórða tug hjálparbeiðna hafa borist frá einstaklingum sem eru yngri en 19 ára og rúmlega 100 beiðnir frá einstaklingum eldri en 70 ára.

Þeir sem leita sér aðstoðar eru spurðir um hvaða framfærslu þeir hafi og nefna flestir eða 45% örorkubætur, næstflestir eða 22% segjast lifa af atvinnuleysisbótum og 15% ná ekki endum saman þrátt fyrir að vera á vinnumarkaði.

Síðasti dagur til að sækja um jólaaðstoð var á fimmtudaginn í síðustu viku. Úthlutunin fer fram í Norðlingabraut 12 (MEST-húsinu) í dag og daglega til og með föstudagsins næsta milli kl. kl. 10-12 og 13-16, auk þess sem úthlutað verður á sama tímamánudaginn 21. desember og þriðjudaginn 22. desember.