Söfnun hlutafjár fyrir vestfirsku kvikmyndina Vaxandi tungl er nú á lokastigi og ljóst er að farið verður í verkefnið. Aðstandendur kvikmyndarinnar hafa óskað eftir 300.000 króna framlagi frá Ísafjarðarbæ.

Fram kemur á fréttavef Bæjarins besta, að  framleiðendur myndarinnar hafi bryddað upp á þeirri nýjung að safna hlutafjár til að fjármagna verkefnið. Menningarsjóður Vestfjarða hafi einnig lagt verkefninu lið.

Um er að ræða fjölskyldumynd sem byggir á sannri, rammvestfirskri sögu úr nútímanum að því er fram kemur í lýsingu á henni. „Þegar er búið að munstra fólk til að starfa og eru margir valinkunnir Vestfirðingar til kvaddir,“ segir í bréfi til bæjaryfirvalda. Einnig eru fyrirhuguð áheyrnarpróf á norðanverðum Vestfjörðum á næstu vikum þar sem leitað er að börnum eða unglingum í þrjú hlutverk myndarinnar. Áætlað er að upptökur hefjist í mars og verða þær að mestu á Suðureyri.

Aðstandendur Vaxandi tungls telja tíma til kominn að sýna og sanna sjálfbærni íslenskrar kvikmyndagerðar og ætla Vestfjörðum að vera fánaberi þeirrar vegferðar. „Kjörorð okkar er: Sólin rís í vestri.

Bæjarráð tók erindið fyrir á síðasta fundi og vísaði því til afgreiðslu við úthlutun styrkja til menningarmála á árinu 2010.