Katrín Jakobsdóttir, menntamálaráðherra, mælti á Alþingi í dag fyrir breytingum á lögum um framhaldsskóla sem fela í sér að framhaldsskólum verði fram til loka skólaársins 2011–2012 heimilt að miða fjárhæð gjalds vegna náms sem þeir bjóða utan reglubundins daglegs starfstíma framhaldsskóla og í fjárnámi við allt að þriðjung af meðalkennsluframlagi á nemanda á framhaldsskólastigi samkvæmt fjárlögum miðað við fullt nám.

Katrín benti á að við breytingu á lögum um framhaldsskólann árið 2008 hafi gjaldtökuheimildir opinberra framhaldsskóla verið þrengdar frá því sem var í lögum frá árinu 1996.

"Til að mæta lækkun heimilda skóla til innheimtu kennslugjalda verður að hækka framlög í fjárlögum úr 67% í 90% af nemendaígildum í kvöldskóla. Samkvæmt fyrirliggjandi fjárlagafrumvarpi er slík breyting ekki í fjárlagaforsendum 2010. Því munu vanta um 20% upp á að framhaldsskólar fái framlög er samsvari kennslukostnaði í kvöldskóla.

Að óbreyttum lögum er ljóst að lagabreytingin mun leiða til aukins kostnaðar fyrir framhaldsskóla sem boðið hafa upp á nám í kvöldskóla umfram þær kröfur sem gerðar hafa verið um hagræðingu innan framhaldsskólans," sagði Katrín og benti á að í ljósi þessa sé lagt til að heimila framhaldsskólum að innheimta gjaldið tímabundið út skólaárið 2011-2012.