Hæstiréttur staðfesti í dag dóm yfir tvítugum karlmanni sem var í Héraðsdómi Norðurlands eystra dæmdur í sex mánaða skilorðsbundið fangelsi fyrir hættubrot en maðurinn setti gúmmíbolta upp í leggöng stúlku og skildi hann þar eftir án hennar vitneskju.  Þremur vikum síðar var boltinn fjarlægður með skurðaðgerð en stúlkan var þá komin með bólgur og alvarlega sýkingu.

Hæstiréttur hækkaði hins vegar skaðabætur sem manninum er gert að greiða stúlkunni úr 600 þúsund krónum í rúmar 807 þúsund krónur.

Fram kemur í dómnum, að pilturinn og stúlkan hittust í júlí í fyrra og fóru í kjölfarið heim til hennar og höfðu samfarir. Þau voru bæði drukkin. Pilturinn sagðist hafa teygt höndina niður á gólf og fundið þar boltann, sem hann setti síðan inn í leggöng stúlkunnar. Stúlkan sagðist hafa talið að boltinn væri eitthvað kynlífsleikfang, sem pilturinn hefði síðan tekið út.

Boltinn var sýndur í héraðsdómi en hann var tæpir 6 sentimetrar í þvermál. Læknir bar, að aðskotahlutur sem þessi í leggöngum geti valdið miklum móðurlífsbólgum og jafnvel dauða.  Stúlkan hafi svarað meðferð mjög vel og muni ekki hafa varanlegar líkamlegar afleiðingar. Hann tók fram að stúlkan hefði verið mjög undrandi þegar hann fann boltann en hún hefði áttað sig fljótt á því hvenær þetta hefði gerst. 

Maðurinn var einnig sakfelldur fyrir brot gegn valdstjórninni með því að hafa hótað lögreglumönnum við störf lífláti. Var háttsemi hans talin varða við 1. mgr. 106. gr. almennra hegningarlaga. Hins vegar var talið að líta bæri til þess að hótanirnar hefðu verið settar fram í ölæði og ekki væri ástæða til að ætla að sterkur ásetningur hefði búið þar að baki til að valda lögreglumönnunum ótta um líf sitt og heilbrigði.