Búðardalur í Dalabyggð. Arnaldur Halldórsson

Fjárhagsáætlun ársins 2010 var samþykkt eftir síðari umræðu í sveitarstjórn Dalabyggðar í gær. Gert er ráð fyrir 11,8 milljóna króna afgangi, þegar aðalsjóður og B-hluta fyrirtæki eru tekin saman í samstæðureikningi.

Tekjur A-hluta eru áætlaðar 464,5 milljónir króna og tekjur samstæðunnar 593,8 milljónir.  Gjöld eru áætluð 552 m.kr. Fjarmagnsliðir eru áætlaðir 29,9 m.kr.  Stefnt er að því að heildarskuldir og skuldbindingar verði áfram undir 60% af heildartekjum sveitarfélagsins á ársgrundvelli.

Í áætluninni er gert ráð fyrir ýmsum framkvæmdum á næsta ári, m.a. við nýtt gámasvæði, skáldastofu í Leifsbúð, klæðningu félagsheimilisins Árbliks, ný leiksvæði, gangstíga, endurbætur á íþróttavelli í Búðardal og minni viðhaldsverkefni.

Fyrri umræða þriggja ára fjárhagsáætlunar hefur einnig farið fram og gefur hún fyrirheit um áframhaldandi heilbrigðan rekstur sveitarfélagsins, að því er segir í tilkynningu. Langtímaskuldir lækka og handbært fé frá rekstri eykst sem aftur gefur meira svigrúm til frekari framkvæmda í sveitarfélaginu. Hlutfall Jöfnunarsjóðs í tekjum sveitarfélagsins hefur farið minnkandi undanfarin ár.

Elliheimilið skuldar sveitarfélaginu 100 milljónir króna

Sveitarstjórn segir einnig algjörlega óásættanlegt að Dalabyggð þurfi að greiða með rekstri dvalar- og hjúkrunarheimilisins Silfurtúns. Kostnaður við slíkt sé verkefni ríkisins, en ekki sveitarfélaganna og þetta verði að leiðrétta.

Er svo komið að skuld Silfurtúns við A-sjóð er á föstu verðlagi um 100 um hundrað milljónir króna. Bendir sveitarstjórnin á að ef þeir sem búa á Silfurtúni þyrftu að leggjast á sjúkrahús, t.d. vegna lokunar á Silfurtúni, yrði kostnaður ríkisins fjórfaldur miðað við upphæðina sem það greiðir Dalabyggð.