Mótmælafundur Hagsmunasamtaka heimilanna og Nýs Íslands stendur nú yfir á Austurvelli og hófst klukkan þrjú. Þetta er fjórði fundurinn sem samtökin halda, gegn tregðu stjórnvalda og aðgerðarleysi varðandi lánakjör heimilanna.

Þegar ljósmyndari Morgunblaðsins var á staðnum laust upp úr þrjú voru á annað hundrað manns mætt á staðinn. Mjög kalt er í Reykjavík í dag því var meira um að fólk slægi sér til hita heldur en að það berði í búsáhöld.

Fundurinn hófst á því að Ellen Kristjánsdóttir tók lagið ásamt Pétri Ben, og Kristján Hreinsson flutti ljóð. Einnig var auglýst fyrirfram að Bjarki Steingrímsson, stjórnarmaður í VR myndi flytja ræðu.

„Það er kominn tími til að stjórnvöld bregðist við kröfum samtakanna um réttlátar og sanngjarnar leiðréttingar, bremsu á frekara tjón og tímasetta áætlun um afnám verðtryggingar hið allra fyrsta. Það gengur ekki lengur að hunsa kröfur fólksins í landinu, sérstaklega ekki í ljósi þess að á fundi HH með AGS kom fram að sjóðurinn telur afslætti á lánasöfnum bankanna eiga að ganga áfram að fullu til lántaka,“ stóð í tilkynningu um fundinn sem send var út í vikunni.