Dómnefnd ásamt verðlaunahöfum. Ljósmynd / UJ

Þórdís Elva Þorvaldsdóttir, höfundur bókarinnar Ofbeldi á Íslandi - á mannamáli, og verkefnið Skólastoð, fengu í dag félagshyggjuverðlaun Ungra jafnaðarmanna, en þau eru veitt þeim sem að mati UJ hafa stuðlað að betra samfélagi.

Fyrr í dag var send út fölsk fréttatilkynning á fjölmiðla í nafni Guðrúnar Ögmundsdóttur, en hún sat í dómnefnd. Hafði verið stofnað netfang í nafni hennar og úr því send tilkynning um að félagshyggjuverðlaunin færu að þessu sinni til Saving Iceland samtakanna, sem hefðu verið mikill áhrifavaldur á Samfylkinguna á þessu ári. Ekki er vitað hver stóð fyrir gabbinu, en skrifað var undir póstinn með nafni Guðrúnar.

Í rökstuðningi dómnefndar segir um Þórdísi Elvu að hún hljóti verðlaunin fyrir framlag sitt til umræðu um kynferðisofbeldi. „Bók hennar Ofbeldi á Íslandi – á mannamáli hefur vakið gríðarmikla athygli og opnað umræðuna um þennan málaflokk. Bók Þórdísar ber svo sannarlega nafn með rentu, hún er á mannamáli og nær einstaklega vel til lesandans. Kynferðisofbeldi er málaflokkur sem kemur öllum við og Ungir jafnaðarmenn vilja heiðra Þórdísi fyrir að bæta fleiri baráttumönnum gegn ofbeldi í hópinn."

„Alma Tryggvadóttir, Hildur Sunna Pálmadóttir, Íris Lind Sæmundsdóttir og Margrét Ágústa Sigurðardóttir hljóta verðlaunin fyrir verkefnið Skólastoð. Fréttir bárust af því í haust að margir foreldrar ættu í erfiðleikum með að standa undir þeim kostnaði sem hlýst af skólagöngu barna þeirra. Þær stúlkur brugðust fljótt við og söfnuðu skólavarningi og námsbókum fyrir þessi börn og unglinga. Verkefnið gekk gríðarlega vel og safnaðist skóladót fyrir um 500 börn. Ungir jafnaðarmenn dást að frumkvæði þeirra og vilja því heiðra þær með þessum hætti. Verkefnið er dæmi um hvernig er hægt að sýna samfélagslega ábyrgð á erfiðum tímum," segir ennfremur um verkefnið Skólastoð.

Ásamt Guðrúnu sátu í dómnefndinni þau Anna Pála Sverrisdóttir og Felix Bergsson.