Héraðsdómur Reykjavíkur Þorkell Þorkelsson

Pizza pizza var í Héraðsdómi Reykjavíkur í dag dæmt til þess að greiða fyrrverandi vaktstjóra á einum pizzastað fyrirtækisins tæpar 70 þúsund krónur í vangreitt orlof en ekki var fallist á miska- og skaðabótakröfu starfsmannsins fyrrverandi, upp á tæpar tvær milljónir króna,  sem var sagt upp fyrirvaralaust vegna gruns um þjófnað. 

Vaktstjóranum var sagt upp störfum í júní 2007 án fyrirvara vegna gruns um að hann  væri að kreditfæra reikninga þrátt fyrir að viðskiptavinir hefðu greitt fyrir vöruna. Var málinu vísað til lögreglu en rannsókn var hætt nokkrum mánuðum síðar án þess að þjófnaðurinn upplýstist.

Vaktstjórinn viðurkenndi fyrir dómi að hafa kreditfært ákveðnar pantanir á umræddu tímabili. Hann bar að hann hefði fært þessar kreditfærslur til þess að laga stöðuna á kassanum þegar peninga vantaði í kassann. Bar hann að hann hefði séð þetta gert á öðrum stöðum hjá fyrirtækinu þar sem hann hafði unnið.

Forsvarsmenn Pizza pizza báru fyrir dómi að þar sem upp hafi verið kominn rökstuddur grunur um að ekki væri allt með felldu á þessari starfsstöð þá hafi verið komið fyrir 6.000 krónum í skiptimynt í kassa stafsstöðvarinnar þar sem viðkomandi hafði einn aðgang að fjármunum. Þessar 6.000 krónur hafi ekki skilað sér í lokauppgjöri dagsins.

Vaktstjórinn fyrrverandi hefur engar haldbærar skýringar getað gefið á hvarfi þessara peninga úr kassa þegar hann var á vakt. Til þess að leyna því að peninga vantaði í kassa kreditfærði hann pantanir sem greitt hafði verið fyrir. Var hann sem vaktstjóri ábyrgur fyrir þessu fé sem hvarf. Telst brot hans vítavert og þykir réttlæta fyrirvaralausa brottvikningu hans úr starfi. Ber því að sýkna stefnda af kröfu stefnanda um skaðabætur og miskabætur, að því er segir í niðurstöðu dómsins.