Snjó hefur kyngt niður á Akureyri og í Eyjafirði í kvöld. Mynd úr safni. Morgunblaðið/Skapti Hallgrímsson

Um níuleytið í kvöld var tilkynnt um að snjóflóð hefði fallið á veginn á milli Dalvíkur og Ólafsfjarðar. Snjóflóðið sem féll er um átta metra á breidd og er vegurinn lokaður. Verður hann ekki mokaður fyrr en fyrsta lagi í fyrramálið, að sögn lögreglu, og enn er talin snjóflóðahætta á þessum slóðum.

Að sögn varðstjóra hjá lögreglunni á Akureyri er um þekkt snjóflóðasvæði að ræða. Enginn var á ferð á þessum slóðum, en talið að flóðið hafi fallið um kvöldmatarleytið. Snjó hefur kyngt niður í Eyjafirði í kvöld og björgunarsveitir eru í viðbragðsstöðu.

Ófærð í Öxnadal og Hörgárdal

Vill lögreglan koma því á framfæri að þjóðvegurinn í Öxnadal og Hörgárdal er ófær fólksbílum vegna mikillar ofankomu, ófærðar og snjóalaga á vegunum.  Lögreglan er á vel útbúnum jeppa en á í mestu vandræðum með að komast í Öxnadalinn til aðstoðar manni á fóksbifreið sem situr fastur í Bakkaselsbrekku.  Ekki verður mokað fyrr en í fyrramálið.

Lögreglan á Akureyri þurfti að loka Leiruveginum rétt austan Akureyrar nú fyrr í kvöld vegna slæmrar færðar og ofankomu en um 10 ökumenn festu bifreiðar sínar við Leirubrúna. Tók um hálftíma að losa þær af staðnum.

Þá var Björgunarsveitin Týr frá Svalbarðsströnd ræst út og fengin til að kanna með aðstæður á Svalbarðsströnd og í Víkurskarði. Að þeirra sögn var um hálfellefu leytið nokkuð mikill snjór á veginum og ekki talið fólksbílafært.

Ekki er gert ráð fyrir að Víkurskarðið verði mokað fyrr en í fyrramálið.