Hrókeringar um áramótin ólíklegar

Þrálátur orðrómur hefur verið uppi um að Jóhanna Sigurðardóttir forsætisráðherra sé jafnvel að hætta í embætti um áramótin og muni tilkynna það á ríkisráðsfundi á Bessastöðum á gamlársdag. Samstarfsmenn Jóhönnu sögðu við Morgunblaðið í gær að ekkert væri hæft í þessum orðrómi, og hið sama sagði hún sjálf í fréttum Stöðvar 2 í gærkvöldi.

Jafnframt er það talið mjög ólíklegt að nokkrar hrókeringar aðrar verði á ráðherraembættum um áramótin en miðað við áform ríkisstjórnarinnar um frekari sameiningar ráðuneyta og tilflutning verkefna þeirra gæti ráðherrum átt eftir að fækka á komandi ári. Til stóð að leggja fram frumvarp á Alþingi fyrir áramót um sameiningu sjávarútvegs- og landbúnaðarráðuneytisins annars vegar og iðnaðarráðuneytisins hins vegar í eitt atvinnuvegaráðuneyti, en af því verður ekki fyrr en eftir áramót.

Andstaða við nýtt atvinnuvegaráðuneyti

Frumvarpið hefur verið í smíðum í forsætisráðuneytinu en samkvæmt upplýsingum Morgunblaðsins hefur það m.a. mætt nokkurri andstöðu hjá núverandi ráðherra sjávarútvegs- og landbúnaðarmála, Jóni Bjarnasyni, og einnig meðal umræddra atvinnugreina sem hafa talið það óráð að hrófla við þessum ráðuneytum á meðan viðræður um aðild að Evrópusambandinu eru að fara í gang. Er engu að síður stefnt að því að atvinnuvegaráðuneytið taki til starfa um mitt árið 2010.

Ríkisstjórnin hefur áður boðað að fækka beri ráðuneytum úr 12 í 9. Auk sameiningar í atvinnuvegaráðuneyti stendur til að sameina félags- og tryggingamálaráðuneytið og heilbrigðisráðuneytið í nýtt velferðarráðuneyti og innanríkisráðuneyti verði til við samruna dóms- og mannréttindaráðuneytis og samgöngu- og sveitarstjórnarráðuneytis en tvö þau síðast töldu fengu þessi heiti nýverið með flutningi verkefna milli ráðuneyta. bjb@mbl.is